試無忌憚:一Fing跣水夠反骨 好遮

試無忌憚:一Fing跣水夠反骨 好遮

夏天一時勁曬一時落雨,真係俾個天玩死,天文台預測又唔係劑劑準喎,出街先嚟落雨,無帶遮都幾頭痕。好彩呢個世界有縮骨遮,不過濕𣲷𣲷擺番落袋又係煩;又好彩,呢個世界有把全跣水縮骨遮,Fing兩Fing即亁,呢啲咪叫方便囉。

記者:王震遠
攝影:楊錦文、陳盛臣
模特兒:Elise@Manzusaka

十蚊遮無料到

每逢落失魂雨,通街啲人都好似擠提咁,湧入7仔或街邊攤檔爭買把十蚊遮,但係講真,有幾多把用完可以完好無缺帶返屋企再用吖,質素係點心照啦。計我話縮骨遮,大風少少吹到反骨都唔緊要,最緊要柔軟度高,識反得番轉頭就基本合格;OK嘞,識反骨嘞,但收遮出入商場又係煩噃,所以如果把遮唔夠跣水,滴到周圍濕晒又盞係攞嚟搞,所以曉跣水先叫做好嘢。
貼錢買難受不如買把好使好用嘅縮骨遮,放定入袋一勞永逸先叫醒,邊把縮骨遮係好嘢,今日做埋測試幫你揀,測試內容如下:一,跣水測試,噴水上遮面,水珠越少代表越跣水;二,反骨測試,凌空一扯反遮,之後反方向再反番轉頭,睇吓把遮夠唔夠反骨。

NANO+全白縮骨遮$200

重180g,純白好搶眼,鋁金屬遮骨加入玻璃纖維,加強柔軟度,拎上手好輕。聲稱遮表面加入咗納米技術,防水防菌,所以跣水力勁高。測試過,無吹水,拍兩下亁晒,好鬼神奇。(a)

跣水度(★★★★★):爆燈,睇住水珠一滴滴跣落地,好似玩緊魔術咁,掂呀。

反骨測試(★★★★★):硬淨,扯兩下先反,柔軟度高,輕易反番轉頭。

珠光布黃色縮骨遮$20

重150g,放落袋唔覺重,薄身鋁金屬遮骨,輕就輕嘞,不夠都好脆呢。遮面係珠光布,易皺,貪靚女仔要諗諗啦。(b)

跣水度(★):水珠跣極唔走,仲變埋水氹㖭。

反骨測驗(★):扯一下即反,遮骨斷埋。

梁蘇記五摺短縮骨遮$315

重200g,五摺遮果然最短,仲短過隻手掌,遮骨硬淨,遮面圖案同撞色都幾In,不過鐵製遮骨,怕唔怕生銹?(e)

跣水度(★★★★):唔錯,剩低好少水珠。

反骨測試(★★★):硬淨,柔軟度唔錯。

簡約粉藍縮骨遮$10

重240g,呢把最似落雨天自動蒲頭嗰啲款啦,至於實唔實用就……十蚊把,自己諗啦。(d)

跣水度(★★):又係一個二個水氹咁囉,唔合格。

反骨測試(★):又係唔使點用力已經反遮,又要好大力先反得番正把遮。

經典縮骨遮$28

重300g,圖案好Oldschool,非常七十年代阿嫲嗰代Feel,舖頭夥計話𠵱家仲有好多人搵呢個款喎,鐵製遮骨好墜手。(c)

跣水度(★★):一般,大大粒水珠積住唔走。

反骨測試(★):好細力已經反骨,好大力先反得番正把遮。

紫色透明塑膠縮骨遮$20

重360g,世事無完美啦,最方便但最重又係佢囉。PVC膠製,㩒個掣自動開遮,拎住大大袋戰利品,單手開遮都無問題。(c)

跣水度(★★★):唔錯,遮面水珠唔算多。

反骨測試(★★★):算硬淨,出盡力先反到佢骨,不過骱位就走晒位。

a.倚天香港有限公司( http://www.etin.com.hk
/31193338) 

b.葵興港鐵站外小販檔

c.聯興雨遮雨衣批發市場(深水埗大南街270號/23878035)

d.蘇氏百貨(深水埗大南街315號/60922773)

e.梁蘇記遮廠(深水埗西九龍中心6樓629室/23865629)