廉價航空公司甘泉航空停飛，據講有近三萬張機票作廢，臨急之下，運輸及房屋局局長鄭汝樺要求其他航空公司幫助疏導乘客。其中以國泰出力最多。諗唔到一啲評論員竟然因此大罵國泰，連《蘋果》作家單仁亦話「國泰失分」，令人摸不着頭腦。國泰肯幫手，係人情，唔係道理，整件事情最應鬧嘅係甘泉航空班股東，其次係事先知情而不知所措嘅官員，做乜嘢要批評國泰？呢個世界真係好人難做也。
買股票，如果散戶唔買滙豐而買咗停牌四線股，散戶會唔會因此而鬧滙豐呢？買機票去倫敦溫哥華，唔買大公司（如英航、國泰、加航）機位而買甘泉，目的係乜，當然係為咗慳錢而唔係為咗安全舒適穩陣。甘泉嘅票價的確好平，好有吸引力，但太便宜，背後必有風險，成年人不應不知。風險變成現實之後，買票人係值得同情嘅，但受同情之餘，買票人不應期望太高，以為一定有人打救，如有人打救，又鬧別人救得唔夠好。且再說一個廉航故事，肥仔Ｋ有兩位日本同學前年乘UA去新加坡，從新加坡坐廉價航空去曼谷，再去菲律賓，諗住從菲律賓返新加坡坐番UA回東京。怎知道在菲律賓克拉克機場，廉航取消航班，佢哋返唔到新加坡，因此亦接駁唔到UA去東京啦，同學盤川已盡，不知如何是好。結果廉航第二朝送佢哋去澳門，在港澳碼頭拿出學生證，凡見到貌似日本人就上前求救，竟然又夠運遇上日本人校友，借到錢買船飛來到香港，到肥仔Ｋ家中借宿，再向肥仔Ｋ父親借錢買港龍機票返東京。佢哋話怕怕咯，以後唔敢再搭廉航。
甘泉創辦人李卓民發聲明，講出三大致命傷，導致甘泉停航。睇真啲，李先生實在係「天真」之人，唔識做生意，其敗也宜。航空生意成本高，競爭激烈，油價不斷上升，種種不利因素，係人都知，何故李先生竟以為投資者可以借到好多銀行貸款嚟做營運費用？李先生嘆息話搵唔到金融機構信貸嚟做燃油對沖，笑死啲賓架，你估銀行儍嘅咩！正是食得鹹魚抵得渴，生意失敗，竟然埋怨競爭激烈，對手不留情，不如搵肥佬黎教一教如何做「壹盤生意」。