「車神」舒密加退休都有成年幾，呢位F1傳奇車手得閒就幫吓舊主法拉利試新車，又會去滑吓雪、踢吓友誼波，生活不知幾寫意。之不過呢位39歲嘅「車神」，可能覺得呢類娛樂太沉悶，又唔想重返F1車壇，而且經常渴望接受新挑戰；所以早兩日喺德國嘅Lausitzring參加電單車賽時，
「車神」以頭位出賽嫌唔夠刺激，主動要求退到最尾開波，結果係點？咪開賽後第1圈炒車收場，搞到要「入廠」小休囉！
炒過3次仲未怕死
以前喺F1賽事入面，不時見到舒密加高難度爬頭鏡頭，撞車意外更避不了；不過F1賽車安全裝備十足，就算部車撞到爛晒，車手都未必有生命危險，好似巴西「車神」冼拿喺94年意外身故真係極之罕有。
相反，電單車就好唔同，如果舒密加依然咁冒險，咁我求大俠都要同佢講聲：「Godblessyou！」原來禮拜二發生意外之前，上個月舒密加喺電單車賽事中已經發生過3次小意外，所以今次過彎炒車撞傷少少，可謂不幸中之大幸。
冇俾意外陰影所困
見到呢位法拉利車隊象徵人物攞自己條命仔嚟玩，難怪佢前老細托特都忍唔住鬧幾句：「電單車點同F1呀，如果早知道嘅話，我肯定唔會批准佢玩電單車！」不過舒密加自己就唔係咁諗喎，就算炒完車要住院養傷，「車神」依然龍精虎猛，完全冇俾意外陰影所困。希望「車神」康復後，踢吓波籌吓款做吓善事，都好過揸電單車；始終人唔係貓，冇9條命嘛！