以快譯通打響名堂嘅權智（601）主席譚偉豪，唔單止搞科技產品耍家，原來對理財都掂，佢好自豪咁同華華講，理財心得來自位師奶。邊位師奶？咪就係譚媽媽囉！
譚偉豪話，細個家境窮，連佢在內屋企有五條化骨龍，靠譚爸爸一個養七個，好彩，譚媽媽係一個精明主婦，將租嚟住嘅500幾呎單位，間成四間房，一家七口住一間，其他三間房就分租出去，收到嘅租金足夠補貼自己份租，亦係咁啓發咗譚偉豪諗計賺錢。
識得搵亦要識得使，仲要用得其所！譚偉豪話：「細個周時有親友問屋企借錢周轉，有次見阿媽為咗幫人，拎咗隻金戒指去當舖。」譚媽媽話，要將啲錢使喺有需要嘅人身上。