投資要做功課，不過，一般散戶就算勤力到每日睇晒心水股份嘅通告，刨埋公司年報，有時都未必明白間公司搞乜，原因啲公司過於遷就法律條例，行文艱澀，搞到啲通告好似外星文字咁。
英國特許管理會計師公會（CIMA）教育部總監RobertJelly認為，上市公司除咗要同金融業界傾偈之外，向公眾維持高透明度亦同樣重要。CIMA前年就搵咗羅兵咸會計師行，喺英國老家推出「企業報告研究專案」運動，提倡報告最好用多啲圖表同相片，仲要用多啲生動活潑嘅表達手法，令散戶知道公司嘅潛在價值。
今次佢哋就特登嚟香港推廣呢個運動，Jelly話，踏入21世紀，公司應該善用互聯網，將冇必要嘅年報資料upload上網，其他先印hardcopy，本書冇咁重又精簡咗，都係一件環保美事。