電盈（008）主席李澤楷「潛水」已有一段頗長時間，大家除咗keep住喺各大八卦雜誌同娛樂版見到佢──張相，都冇乜佢嘅消息。唔蒲頭唔代表好清閒嘅，據聞除咗忙緊幫佢「至愛」衝出香港（華華係講將now衝出亞洲，唔好亂諗！），仲接受吓國際傳媒訪問，好似前幾日就幫BBC做咗個專訪，而且仲講到香港貧富懸殊呢個似乎冇乜有錢人關心嘅問題！
今晚接受BBC訪問
對於呢個問題，貴為香港超級富豪之一嘅李生點睇呢？佢同意貧富懸殊幾嚴重，亦好關心呢個問題，認為政府應該要做多啲嘢，因為呢個問題解決唔到，除咗會影響到社會安定同埋香港嘅競爭力之外，亦會打擊埋創造力咁話。
佢仲有感而發話，以前香港人好有理想，好多人一路打工一路儲錢，然後創業，但𠵱家物價上漲，人工就冇乜點加，令到發夢嘅人越嚟越少……簡單啲講，即係話政府做唔到嘢！
不留名幫天水圍年輕人
咁天水圍又係咪咁悲情呢？李生唔認為喎，佢話天水圍都有好多幾好嘅規劃，只係交通要做好啲咁話。好似佢老友俞琤今年初搞咗個天比高創作夥伴計劃，幫天水圍班年輕人，據聞反應唔錯，而呢個project，查實李生係幕後出錢出力功臣之一，不過佢貫徹行善不留名嘅作風，所以冇乜人知，聽聞稍後佢仲會加碼幫手㖭。
BBC訪問今晚出街，以李生牌頭，加埋佢作為富豪第二代講貧富懸殊呢個社會問題，一定有叫座力啦，華華覺得有一個人更加要睇呢個訪問，咪就係當日選特首時，受咗李生一票，但又冇做過啲乜嘅煲呔曾囉！
電郵：mailto:[email protected]