商界唔少人都係球迷，好似時富投資（1049）董事長關百豪，就係其中一個！今勻佢趁住時富十周年，以公司名義贊助英超嘅曼城，同埋意甲嘅祖雲達斯嚟香港，同本地薑南華作賽。
佢話，公司十周年想搞慶祝活動，咁自己、同事同埋啲客仔，唔少都係標準足球迷，因利成便，咪贊助足球比賽囉！
佢仲爆料話，曼城同埋祖記呢兩支球隊，係佢同南華班主羅傑承傾咗好耐先有定案，至於點解揀呢兩隊？咪就係價錢同檔期都合乎要求囉！
咁大家估佢捧邊隊呢？唔係曼城亦唔係祖記呢兩隊過江龍，而係本地薑甲組足球隊南華，原來關百豪一直係南華「死硬」粉絲，難怪唔崇洋幫自己人。