陶傑寫「抵制法國貨」，夠晒抵死。中國內地網民因奧運聖火在巴黎四度熄滅、重燃，勾起民族主義情懷，大罵法國，聲言抵制法國貨，都唔知信唔信好，內地管控互聯網咁嚴密，一啲網民言論，點知係唔係宣傳部、公關部的寫作班子安排㗎？以此而認為「民氣可用」，未免牙煙啲。呢幾日如果記者冇嘢做，不妨在廣東道LV新店門口訪問吓在門外排隊群眾（要講普通話），問吓佢哋點解唔反法國，點解要排隊買法國貨？
愛國報紙以全版報導巴黎消息：指法國政府故意邀請反華悍將出席招待會，暗地裏有陰謀破壞聖火傳遞、警察保護聖火不力等等。唉吔，駐法記者（或當地華僑）應知法國事，巴黎係法國示威之都，每次示威都唔同人咁品，衝擊奧運聖火嗰次，已算溫文。聖火走後，法國中學生與教師上街示威，反對薩爾科齊總統嘅教育改革，削減中學教師職位，與警察大打出手，警方要施放催淚彈。換轉係香港，張文光帶教師上街，未開波已經要講定係和平遊行啦，邊度會有法國中學生與教師咁激呀。法國警察有太多經驗嘞，視奧運聖火傳遞為例行公事啫，唔使話人哋有陰謀嘅。
倫敦、巴黎市長畀奧運聖火依照擬定計劃行事，係負責任做法，被示威者衝擊，冇得好講。反而三藩市市長就十分冇擔當，臨時改變及縮短傳遞路線，好鬼祟，玩弄晒傳媒、示威者、愛國華僑以及火炬手，各方面都唔高興。呢位市長GavinNewsom生於一九六七年，係一百年來最年輕三藩市市長，○三年當選，○七年連任，○四年時准許同性結婚，轟動全美。既然年青得志，追女人唔使本，與女秘書上床，而女秘書就係佢位選舉競選經理嘅老婆！○五年離婚，舊年十二月又同另一位女士訂婚。雖然私生活咁風流，仍然民望甚高，可見政治手腕不凡，亦好滑頭。佢呢次咁樣處理奧運聖火傳遞，根本睇唔起聖火之莊嚴以及傳遞之意義，總之係抱住啲「快啲走，唔好煩親阿叔」嘅心理嚟對待奧運聖火，根本就係一種侮辱，如果中國網民只識鬧法國而唔鬧Newsom，未免天真啲咯。