加拿大天后CelineDion上星期喺上海舉行巡迴演唱會，仲俾內地傳媒影到佢懷疑趁空檔買A貨。Celine馬不停蹄繼續巡迴，前晚就到馬來西亞吉隆坡演出一場「CelineDion2008大馬為愛冒險世界巡迴演唱會」，雖然票價不菲，最貴更高達兩千幾港元，但當晚佢落力演出，仲唱足超過個半鐘，令到fans非常興奮。
安哥兩次
Celine開騷，大馬元首夫婦同副首相等都有去捧場，佢哋同普通歌迷一樣，聽完最後一首歌都唔捨得離開，直至Celine安哥咗兩次，大家先心滿意足離場。對於元首都係座上客，Celine感到好光榮，佢話：「我衷心希望元首夫婦可以盡情享受今晚的演出。」
雖然演唱會程序同上海嘅差唔多，但歌迷都聽到如癡如醉。Celine為紀念老牌樂隊TheHeart同已故騷靈教父JamesBrown，唱咗唔少佢哋嘅舊作。