上床要做足安全措施，入廚房一樣要，要夠薄、夠韌、唔可以穿……嗱嗱嗱，咪心邪，我講緊保鮮紙咋。一盒保鮮紙在手，可以防止生熟食物交叉感染，防止氣味餸汁周圍漏，邊隻牌子黏性最勁，最有彈性兼鋸口鋒利？睇嘢啦。
記者：洪偉順
攝影：楊錦文
模特兒：Kibby@StagesModel
焗同烤咪用
先講冷知識，保鮮紙無正反面之分，是但一面都係咁用，之可以黐得咁實，唔係因為有任何黏性物質，係因為帶有靜電，只要用風筒吹走靜電，保鮮紙就會變得好平滑，唔會扭埋一堆，當發現黐得唔實，咁暗示保鮮紙可能已經過期或無晒靜電。另外，有啲保鮮紙會註明放得入微波爐，因為耐熱度較高，所以要注意盒上說明嘅耐熱程度，焗同烤，咪亂用，因為保鮮紙一定會溶，食埋落肚會死人㗎。是日測試，一，扯平保鮮紙面，10吋高距離彈波子，測彈力；二，吊起一袋410g波子黏在鐵通上，測韌力；三，鋸木頭雜誌，測鋸口鋒唔鋒利，又睇吓邊隻牌子最掂檔？
日立保鮮紙$12
望盒面資料，聲稱耐熱度可達130℃，較軟紙身，黏力超強，信心保證唔怕餸汁周圍流，睇埋價錢，覺得佢特別抵買！（c）
彈力（★★★）：彈起4吋半。
韌力（★★★★★）：拉長扯到行變形，捱到3分05秒先跌，黏力最勁。
鋒利度（★★★★）：不俗，可保留鋸齒另作他途。
首選牌特韌保鮮紙$10.9
講明唔可以放入微波爐，厚身，彈力OK，但拎上手覺得包裝盒好似削啲，唔多夠硬淨。（a）
彈力（★★★★）：彈起5吋。
韌力（★）：捱到51秒，唔多掂。
鋒利度（★★）：盒身支撐力不足，鋸完金屬，鋸齒扭曲。
康能無毒保鮮紙$12
國產貨，自稱無毒喎，不過唔知點證明，亦無講明可唔可以放入微波爐用，鋸齒唔夠硬淨。（d）
彈力（★★★★）：彈起5吋。
韌力（★）：捱到1分鐘，吸附力好一般。
鋒利度（★★）：鋸兩鋸，鋸齒開始蓉蓉爛爛。
鑽石保鮮紙$14.9
常見牌子之一，無寫明可唔可以叮嘢用，紙身厚，無乜彈性，我覺得包裝設計普通咗啲囉。（a）
彈力（★）：彈起3吋多啲，最渣。
韌力（★★）：捱到1分30秒，算係咁啦。
鋒利度（★★★★）：產生大量木屑，都幾勁，唔好俾小朋友掂到。
佳能保鮮紙$10.9
最常見牌子，紙身較軟，設有微波爐裝，黐力表現突出，鋒口好利，鋸木頭好齊口，當手鋸用都得呀。（a）
彈力（★★★）：彈起4吋半。
韌力（★★★★）：捱到2分30秒，黐力強勁。
鋒利度（★★★★★）：鋸力勁，鋸口齊。
旭保鮮紙2盒裝$14.9
軟身，適用於微波爐，耐熱140℃最高，好容易撕，不過黐力弱，勝在價錢抵，買一開二。（a）
彈力（★★★★★）：接近6吋高，最彈。
韌力（★）：捱到18秒，強差人意。
鋒利度（★★★★）：鋸力勁，鋸完盒身絲毫無損壞迹象。
japanhome塑膠保鮮紙$11.5
日本牌子，紙身軟，黐力令人大跌眼鏡，幾好彈力都無用，保護唔到食物就唔使講嘢，估計好易撕爛。（b）
彈力（★★★★）：彈起5吋多少少。
韌力（★）：拉到嘞嘞聲，只捱到17秒，大失所望。
鋒利度（★★★）：唔使點用力都鋸得幾深。
a.惠康
（北角英皇道238號康澤花園地舖/25716421）
b.日本城
（北角電氣道100號地舖/25707178）
c.壹家易
（天后電氣道60號地舖/25033383）
d.萬豐家居百貨
（北角電氣道104號地舖/28068353）