西九龍「圓方」商場開市後，左丁山一直未去過，只係聽人講「圓方」佔地甚廣，裝飾輝煌，名店林立，而且唔少新店係「全港獨家」㖭。上星期有老校友自多倫多回港，兩公婆自己走去「圓方」一行，行完後對左丁山講：「嘩，圓方真係豪華，見面更勝聞名，入面啲廁所直情係五星酒店級，我哋喺加拿大未見過咁靚嘅商場廁所！你都應該去行吓。」
左丁山素來冇時間行商場，聽完只好唯唯諾諾。哈，好彩有食神，有朋友請吃晚飯，地點就係去時髦嘅圓方利苑。從中環坐東涌線港鐵去九龍站，票價七元七角，好快就到。一出閘，嘩，商場咁大，點去搵利苑呀，係邊個區？幸好陪同公關大姐大去食飯，佢依稀有印象，卒之行吓行吓就搵到。呢間「利苑」好大間，甚為寬敞，比起最好食嗰間洗衣街利苑（幾位利苑fans一致認為洗衣街間舊店最好），地方舒服好多，唔使咁緊迫。
到利苑食飯，多數滿意嘅。食完已經九點，大姐大話機會難逢，係要順便參觀商場先，中環置地廣場晚上九時，已經收晒舖，估唔到圓方內嘅名店，全部照常營業，好似唔識收工咁，於是大姐大話：「以後記住，點忙都好，可以到圓方做lastminuteshopping！」
女士行商場，可以忘記時間，左丁山就唔同，一路望住指示牌，睇吓的士站在何方，點樣以最快時間鬆人。卒之大姐大肯走嘞，左丁山以最快步伐，由南區走到北區，走出門口，搵到的士站。唉吔，置地廣場門口就每晚的士排長龍等客，呢處就一架的士都見唔到，幸好附近有豪宅，點都有的士落客嘅，果然等多幾分鐘就有空車駛到，可以打道回府。
朋友話圓方商場在周日水靜鵝飛，周末就逼滿人，食肆只做兩日生意，唔知夠唔夠交租。在此租舖，大概要死守一段時間，待兩間五星酒店，國際商業中心與豪宅天璽入晒伙之後，先至會有大量人流！九龍站將來會成為九龍各港鐵/東鐵/西鐵線匯聚處，係交通樞紐，相等於東京嘅東京站，唔旺先至奇。