受上周五美股急跌拖累，恒指噚日一開市就裂口低開近700點，隨後一直喺低位徘徊，最終跌856點收場，專家認為現時大市屬正常調整，並非過份。
沈：沈振盈 朱：朱紅 孫：孫柏文
孫：今日恒指急跌850幾點咁多，係咪市場反應過敏呢？
沈：未必係過敏，睇番港股上星期走勢，原本幾健康，但臨到星期五就俾人挾高咗，今日跌可以話調整上星期五過份嘅升幅，加上恒指由低位反彈到𠵱家，升咗4000幾點，出現700至1500點調整唔過份。
孫：窩輪情況又點？
朱：今日窩輪成交唔算多，有投資者喺低位都有撈番國壽（2628）、中移動（941）同中海油（883）等熱炒嘅輪。
孫：我哋之前都講過恒指會回到23300點，先有力再彈上26000點，咁現時喺咪已經唞完？
沈：港股有機會補番23400點嘅上升裂口，投資者可以分注入市，喺23800點左右先入一注。
平保掛鈎投資蝕入肉
郭小姐：舊年喺銀行俾人𠱁咗買平保（2318）ELI（股票掛鈎投資），但平保跌咗咁多，計埋賺到嘅利息，股價要到85蚊先打和，點計都蝕過萬，點算好？
沈：平保呢個位有機會反彈上番70至75蚊，但要去番80蚊就要有利好因素配合，如果啲錢唔係等住使，接咗貨後可以長線持有，如果唔係就要先計數。
郭小姐：可唔可以溝貨？好後悔冇喺四十幾蚊溝貨！
沈：溝貨要睇時機，睇錯咗再跌落去仲會輸多啲，加上郭小姐開始投資時冇諗過揸貨，𠵱家被迫上車，所以更加唔好溝貨。
孫：如果平保上番70至75蚊，有冇輪可以博吓溝淡？
朱：未掂過輪，又唔熟ELI，就千祈唔好呢刻買輪溝淡。郭小姐接貨後，可以先沽出一部份套現，其餘長揸。
《牛頭角郭小姐個案》
買入價：-
目標價：85元
止蝕價：-
時期：-
趁A50急跌撈底
陳小姐：今日見A50中國基金（2823）急跌咗6%，喺17.14蚊入貨，點睇呀？
沈：A50短期會有波動，但相信就算跌，個底唔會太深，估計喺16.5蚊會有較大支持，中線嚟睇佢有條件反彈，第一個目標價先睇20蚊，呢個位應該唔難到，再樂觀啲，可以上番22蚊，但暫時未見有動力可以去番以前嘅高位。
朱：最近大家嘅情緒都覺得A股已見底，因為近排睇唔到內地有新一輪嘅緊縮政策出台，中央政府可能會透過人民幣升值，取代加息或者加存款準備金，A股喺3300至3400點有機會短期見底，所以都可以睇番隻A50。
《北角陳小姐個案》
買入價：17.14元
目標價：20元
止蝕價：16.5元
時期：一個半月