前兩日一早去灣仔試車，跟住又要去旺角做嘢，懶得搵位兼諗住慳隧道費，所以選擇搭港鐵同巴士出入。正因為咁，我發覺到家陣啲巴士公司嘅服務真係好有「心思」……
話說嗰日同攝影師食完Lunch，就行過去港灣道新鴻基中心對開嘅104號線巴士站等車過旺角，嗰度係臨入隧道前最後一個站，諗住就算塞車都只係塞一陣啫。點知行到過去，先見到車站附近有修路工程，車站搬前咗些少，咁惟有行多兩步當運動啦。到咗車站，見到有條水蛇春咁長嘅人龍，再睇睇個臨時站牌，都四四正正，上面有張幾乎係A3Size嘅白紙，黑底反白大大隻字「104」。但到上車嗰陣，我先見到下面原來仲有兩行字，就係話你知經呢個車站嘅104號巴士係前往白田㗎！同行嘅攝影師話：「啲字仲細過臨時巴士站嗰幾隻字，英文嗰句直頭唔行埋去都睇唔到，咁樣不如唔好整啦，驗眼咩家陣！」諗諗吓佢又講得無錯，雖則個站係臨時啫，既然都用到咁大張紙嚟做站牌，咁點解目的地嗰幾隻字唔做大啲方便乘客呢？莫非佢哋想幫乘客驗埋眼，睇吓佢哋有無近視？
記者、攝影：丹尼斯