華華噚日見到玩具大王、旭日國際主席蔡志明，佢大女加敏就快做媽咪，呢位準外公一提起就嚟出世嘅外孫女，笑到見牙唔見眼，問佢準備送乜畀外孫做見面禮？佢笑笑口話：「呢啲老婆負責，不過一定唔會係玩具囉！」
加怡搵錢叻過家姐
蔡志明話，就快抱孫嘅心情好輕鬆，但諗番當年老婆生女嗰陣，緊張到不得了。「當年環境麻麻，做老竇要照顧個女之餘，負擔重好多，唔似得家吓抱孫，又唔使養佢，又唔使操勞，淨係負責同佢玩就得。」
大女加敏唔使佢點操心，反而細女加怡從商經驗少，成日要蔡志明提點。佢話，當年分別打本500萬及300萬銀畀兩姊妹做生意，細女畀得少啲，唔係偏心，而係加怡讀理財出身，搵錢應該叻過家姐。
最近佢同兩個女做賽後檢討，本嚟阿妹應該跑贏家姐，之不過衰在「同公司談戀愛」，覺得高位出貨會俾人話管理層對公司冇信心，所以即使香港體檢（397）股價高嗰陣，加怡堅持唔沽貨套現，所以咪賺少咗囉！