前幾日有傳長實（001）會做白武士救甘泉航空，雖然噚日長實已經澄清，但一大班記者喺「香港常州商會」成立典禮上見到超人李嘉誠，都死守唔走等超人開口。
典禮結束後，超人喺君悅酒店門口等車時，記者一湧而上，超人先回應兩岸關係好似好咗。咁有冇興趣去台灣投資？佢話「有呢個可能性」；至於對甘泉嘅回應就好鬼馬咁講：「你哋一個二個問（甘泉），哈哈，我今日只講常州。」可惜！
華華可惜嘅唔係超人唔做白武士，而係超人間接成為摧花手。去過君悅嘅都知佢哋門口雖然唔細，但忽然幾十個記者同酒店保安你追我趕，唔止大堂嘅花牌俾人掃冧，連門口嘅盆栽都爛埋，清潔阿姐真係多得超人唔少。