天氣開始熱，女士們的背心短裙開始出動，肥膏、贅肉已不能靠長袖衫褲來遮掩了。除了做運動，也要靠食物來消滅。吃減肥餐不是清蒸就是白烚，味道一定很寡，健康食療專家唐安麒說：「減肥餐不一定淡茂茂，我教你自製醬料，包你讚好味。」且看她教我們怎樣煮惹味醬汁。
記者：黃潔蓮
攝影：譚盈傑
示範：健康食療專家唐安麒
Angel小檔案
現為唐安麒國際集團總裁。修讀香港理工學院體重控制學及香港大學中醫營養學，以健康食療專家形象示人。
「指婦」唐安麒：牛排先蒸後煎唔會毒
看Angel的刀工，真的有點嚇人，深怕她會切到流血，「我好怕揸刀，所以喺屋企都係叫工人切定材料，我負責炒餸，所以我唔係『煮婦』，係『指婦』。」
還有她奉行五色菜，食物要有齊五色，餸菜變得更均衡有營。而她亦自創獨門烹調法，例如煮牛排會先蒸再煎，「方法雖然古怪，但係好味就得啦，牛排由生煎到熟要煎好耐，過程中會產生毒素影響健康，我先蒸牛排至半熟才煎，既有煎的香口，又唔會煎燶產生毒素，健康好多。」
腐乳五色菜
0hr25min
4人份量
五色菜對照五行及心肝脾肺腎都有益處，紅黃綠三色燈籠椒，加黑芝麻與白色的芽菜仔，蔬菜含高纖維，多吃也有益。
材料
芽菜仔4両、青紅黃椒各1/2個、黑芝麻適量
腐乳醬材料：有機香辣腐乳8塊、蒜茸2湯匙、辣椒1隻（去籽切粒）、芫荽1棵（切碎）、糖4湯匙、麻油1湯匙、水2湯匙、有機黑豆豉油2湯匙
做法
1.腐乳搗碎成泥，加入其他腐乳醬材料撈勻待用。
2.芽菜洗淨；青紅黃椒去籽後洗淨切絲。
3.煮滾半煲水，先將芽菜汆水後撈起，再放入所有椒絲灼熟，撈出後與芽菜一起用凍開水冲淨後盛碟上，將其中1湯匙醬汁淋在芽菜上，再撒上黑芝麻即成。
Mandy問：點解要浸凍水呀？
答：這道菜是冷盤，浸凍水或冰水，可令蔬菜更爽脆。
伍小姐問：腐乳鹽份好高，係咪健康？
答：有機腐乳味道可能不及一般好，但含天然酵素較有益。
五味魷魚
0hr15min
4人份量
由多種配料及有機醬料調成的五味醬，利用醋的酸、茄汁的甜、蒜頭的香、辣椒的辣、麻油的香味，令白灼魷魚更加美味。
材料
魷魚3條、西蘭花1棵、葱1條（切段）、薑2片、米酒1湯匙
五味醬：葱1條、芫荽1棵、薑2片、蒜頭4粒、辣椒1隻、有機黑豆豉油1湯匙、有機茄汁5湯匙、糖3湯匙、醋2湯匙、麻油1湯匙
做法
1.所有五味醬材料切碎，辣椒去籽，把材料撈勻，取其中3湯匙備用。
2.魷魚劏開，去除內臟，洗淨切塊及𠝹十字花。
3.煮滾半煲水，將西蘭花灼熟撈起，加入葱段、薑片及酒，隨即加入魷魚灼1至2分鐘，撈起後用凍水冲淨。
4.將西蘭花排在碟上，放上魷魚，淋上五味醬即成。
盧小姐問：我怕膽固醇高，好少食魷魚，有乜食物可以代替魷魚，又同呢個醬好夾呢？
答：魷魚確是膽固醇高，但只要不是經常食魷魚就沒問題。海產類如九孔鮑魚及蝦仁可代替。
脆口肉餅
0hr30min
4人份量
肉餅加了冬菜和馬蹄，所以變得「嗦嗦」聲，而且可令肉餅更爽口！
材料
免治豬肉6両、冬菜2湯匙、冬菇3隻、馬蹄粒2湯匙、橄欖油3湯匙
調味料：有機黑豆豉油11/2湯匙、糖1/2茶匙、酒1茶匙、有機惹味豉油1茶匙、麻油/胡椒粉各適量、蛋白1個、生粉2/湯匙、水5湯匙
做法
1.在碗中加入所有調味料調勻備用。
2.豬肉放入大碗內，加入調味料順着同一方向攪拌，直至有黏性。
3.加入冬菜粒、馬蹄粒、冬菇粒及橄欖油拌勻。
4.把豬肉放入碟中，以中火蒸12分鐘至熟即成。
李小姐問：肉餅加油去蒸，會唔會好肥膩呀？
答：「食好油會靚、食壞油會病」，只要是質素好的油，如初榨冷壓特純橄欖油及葡萄籽油均是不飽和脂肪，但橄欖油不適宜高溫烹煮，這反而會釋出毒素，對身體有害。
蘋果瘦肉湯
2hr00min
4人份量
蘋果清甜，瘦肉沒肥肉，沙參、玉竹滋陰清熱，Angel說煲湯的蘋果最好連皮一起煲，營養會更豐富。
材料
紅蘋果2個、沙參/玉竹各1両、南北杏5錢、瘦肉1斤、鹽少許、薑1片
做法
1.蘋果連皮洗淨，去心後切塊備用。
2.瘦肉洗淨切塊，放入滾水中加入薑片汆去血水約1至2分鐘，盛起備用。
3.將所有材料放入滾水中，先用大火煮10分鐘後，再轉以小火煲2小時，待各材料煮至出味，加入少許鹽即可食用。
梁小姐問：用邊種蘋果煲湯好呢？加埋蜜棗得唔得呢？
答：最好用有機蘋果，不含農藥，連皮煲都不怕，每個$7至$9。加蜜棗會更甜，但份量不可太多，1至2粒就夠了。
網上重溫
http://cooking.appledaily.com