噚日華華睇報紙，見到永隆銀行（096）伍絜宜嘅訃聞。原來伍先生上個月29號騎鶴西去，享壽101歲，算係笑喪，呢個禮拜日出殯。
講開永隆銀行，近呢幾年都成日傳佢哋賣盤，但之後都一一澄清，不過，上個月中，永隆賣盤傳聞又再傳得鬧哄哄，仲喺19號停牌，跟住佢哋承認就可能出售股權作出考慮。數吓日子，距離伍絜宜離世只係十日。
離世前十日證實賣盤
伍氏家族早喺1933年創立永隆，並在港開枝散葉，但講到家族生意接班人，似乎有啲棘手，過去幾年，永隆嘅掌舵人個個都德高望重，年紀有番咁上下，現時坐董事局內嘅伍步高及步剛都已年屆七十，其他「步」字輩嘅非執董都六十幾歲，換班迫切卻似乎冇乜人選，搞到成日被傳賣盤。
直至伍步剛個仔尚豐2000年入局做非執董，04年轉做執董兼高級經理及助理總經理，正式參與管理永隆，外界認定佢係永隆第三代掌門人，令伍氏家族對賣盤的意向有唔同睇法。不過，隨住第一代伍宜孫、伍絜宜去世，相信永隆後人賣盤嘅包袱會冇咁重。