已經37歲嘅傅明憲（Gigi），自從上市公司主席老公葉劍波，因涉嫌串謀欺詐被捕後，唔經唔覺佢哋分開咗兩年，雖然呢兩年同分居冇乜分別，但係佢對老公嘅事一直守口如瓶。不過Gigi不愁寂寞，因為佢身邊不時有男伴相陪，好似之前傳同莊士集團太子爺莊家彬交往，而佢前晚又出動，單拖出席曾志偉嘅生日派對，實行唔理人哋點講。
前晚曾志偉同一班圈中好友慶祝佢55歲生日，出席嘅有姚樂怡、傅明憲、山上詩鈉、俞琤同梅小惠等，佢哋先去銅鑼灣利舞台一間酒樓食飯，其中俞琤同一名外籍女士出現，而佢哋嚟咗唔夠5分鐘，同俞琤傳過緋聞嘅上山詩鈉都跟住嚟，大約喺10點45分，佢哋食完飯離開，個個都有啲醉意，好似陳彥行塊面紅紅哋，就連條頸都紅埋。
玩到凌晨
但係佢哋好似意猶未盡，繼續去洪天明有份投資嘅BASEMENT酒吧狂歡，喺大約11點見到側田一個揸車嚟，不過佢唔識路搞到要問記者點去，佢仲話送咗啲心意畀哎吔老竇，而崔建邦則送咗T恤同頂帽俾志偉。到咗凌晨兩點，傅明憲先至離開，佢上咗阮兆祥架車走人，至於主人翁曾志偉喺4點幾先至走，佢一上車幾乎立刻瞓得着。
追討欠薪
此外，據內地南方都市報報道，曾志偉同眾星喺東莞開咗間「美食獎門人」，係間以明星作招徠嘅餐廳，點知𠵱家間餐廳已經執笠，仲俾成班員工追討欠薪160幾萬㖭。
噚日馮仁昭去咗東莞橫瀝鎮「美食獎門人」所見，門前掛咗曾志偉嘅相做生招牌，仲有莫少聰、梅小惠、阮兆祥、吳啓華同江欣燕為呢間餐廳開幕時候嘅相，不過間餐廳就已經鎖住咗，仲鬼咁污糟有死老鼠㖭。
呢間餐廳喺06年5月14日開幕，不過喺今年3月18日已停業，據知餐廳開業3個月疑因債務問題，已由一間房地產投資公司暫代管理。馮仁昭噚日搵到志偉回應，佢喺電話度話：「我哋喺一年前已經退晒股，賣晒盤，所以已經唔關我哋事!」