劉美君喺今個禮拜六開騷，佢前晚喺九展同樂隊綵排，又唱又跳，十分投入。 問佢怕唔怕會失聲？佢話：「啋！大吉利是咩，我飲多啲水，有充足睡眠就得，平日咪盡量唔講嘢囉。」 劉美君仲話自己冇失眠問題，佢話：「我數三吓就瞓着，不過話唔緊張就假嘅，我最驚到時玩得開心得滯，唔記得歌詞咋！希望歌迷會體諒啦。」