去年在內地大受歡迎的節目《舞動奇跡》，新一輯將由胡杏兒、湯盈盈等舞鬥內地藝人。舞藝水皮的洪天明、鄭嘉穎等自封「殘廢少年」，更夾計合作拖累內地女星，令港女星晉級，認真無賴！
胡杏兒、湯盈盈、鄭嘉穎、伍詠薇、王君馨等昨日一早在機場出發往湖南，參加TVB與湖南衛視合作的《舞動奇跡》舞蹈比賽，人人大箱小箱行李，食物舞鞋一大堆。
參賽的男藝員如馬國明、洪天明等均自認舞藝水皮，更自封為「殘廢少年」，洪天明說：「女仔就叻，我哋男子組好渣，個個都跳得好差，跳牛仔似爛仔，係五個殘廢嘅少年。」鄭嘉穎更慘被封為「殘廢隊隊長」，他謂已經準備秘密武器作殺着，他說：「因為我哋同內地女星合作，到時我哋跳衰咗，一齊死，拖累內地女星，咁咪等我哋啲香港女仔打入第二round，呢啲係犧牲小我，完成大我。」
感覺似談戀愛
早前手部神經發炎的湯盈盈，表示情況已好轉，到時會大跳Tango及貓舞，故近日在家狂睇《Cats》，學習誘人姿勢，又指舞衣均十分性感貼身，她說：「我已經帶咗好多嘢食去，到時谷肥晒佢哋，等我睇落瘦啲。無論輸贏，我最希望係可以順便收身減肥，同埋學好普通話。」胡杏兒則說：「好緊張，唔止要貼身咁跳舞，仲要跳出好似談戀愛嘅感覺，好似做戲咁。」
採訪：顏英儀
攝影：陳順禎
