唔講唔知，原來側田同盧冠廷有好多共通點，除咗大家都識作曲，唱歌好聽外，原來佢哋讀同一間大學，一樣有學習障礙，加埋禿頭，假如叫側田做「小盧冠廷」，應該唔會有人反對。
同樣有學習障礙
盧冠廷向來有學習障礙，記歌詞同讀大字報對佢嚟講都好難，惟有靠死記。前晚佢喺將軍澳電視城錄影《盧冠廷天鳥回歸音樂會》前，問佢咁樣，係咪唔會怪後輩忘詞？佢話：「綵排時側田都唔記得，啦啦啦咁帶過，佢話佢記性有啲問題。」擔任嘉賓嘅側田現場唱hiphop版《天籟》，真係唱錯歌詞兩次，又啦啦啦咁帶過，盧冠廷喺台上同佢講：「好勁喎，勁到嘔飯呀，你有冇嘔呀？」側田話：「頭先唱錯歌詞，真係唔好意思。」然後佢哋傾偈，周時講完都唔知自己講緊乜，好鬼搞笑。
事後側田話：「我係有少少學習障礙，自己歌都成日唔記得。」問佢幾時發現，佢話：「我細個鍾意發白日夢，好專注一件事時，人哋叫極我都冇反應，我又好難專心，記憶力差，只係對音符好啲，我諗應該唔會有人怪我。」
盧冠廷話有學習障礙嘅人容易流口水，佢因為太緊張紅館個唱，瞓覺時不停流口水搞到枕頭濕晒，又話自己係死硬派，即使有學習障礙都要死記歌詞，唔畀自己求其帶過，有人話譚詠麟都成日唔記得歌詞，盧冠廷話：「人有好多級數，佢唔係完美主義者，我係但做唔到，我唔係話佢級數低。」問盧冠廷會唔會勸側田鼓起勇氣除帽，佢好愕然問：「乜事呢？」知道大家都係禿頭後，盧冠廷話：「人哋私隱啫，佢舒服就會畀你睇，唔覺得舒服咪唔畀你睇囉。」