傳遞奧運聖火，在倫敦、巴黎、三藩市都發生有規模嘅示威抗議，令中國失面子。聖火去到印度更令人擔心，因為印度有好多西藏人，亦係達賴喇嘛據點，佢哋盡力阻止聖火嘅話，場面會更加激烈。
西藏在三月間發生暴亂，引來鎮壓，時間上適逢奧運聖火開始傳遞之期，你話巧合固然OK，話早有預謀，故意由此挑起國際反應，亦合道理，中國境外輿論，同意中國者少，同情西藏人者多，無可否認，係中國國際公關嘅大失敗。左丁山同幾位公關界人士傾起，中國已成為世界第三大經濟強國（以名義GDP計），與三十年前大大不同，所有國際企業都要畀面中國，唔敢批評中國。但在政治語言上，公關技巧上，中國今天嘅做法，與三十年前相同，就係一定性，二痛罵，三攻擊，四話西方傳媒別有用心，僵硬立場絲毫不變。今天已有互聯網，私人網誌、YouTube及無遠弗屆之衞星電視，與三十年前只睇報紙/仲未有傳真機嘅時代完全唔同咯，打公關宣傳戰點可以沿用三十年前策略呀。
聞說中國早已搵咗Hill&Knowlton做公關顧問，發生西藏事件後，會再請多一間大公司做公關顧問。有顧問，又如何？一位公關界老友講過，一間機構請公關顧問，但董事會內有好多「老人」在，意見及觀點與二十一世紀不相稱，公關顧問最後只能聽董事會命令行事，顧問引入嘅新設計，新口號，一一被否決（理由係：不合本機構傳統及內部文化），但做得公關顧問，梗係識do啦，聽命行事亁收銀便是。視乎今天中國國情，即使華府與倫敦最top嘅公司做咗中國公關顧問，亦無法扭轉局勢。公關第一招就係遊說傳媒，偏偏中國愛國人士不斷在網上痛罵CNN，甚至向CNN記者發出死亡威脅，公關點會有計呀？反CNN而能夠在國際上塑造良好形象嘅，到目前為止仲未見到有成功例子。十幾年前有人發宏願建立中文國際新聞網絡，不讓CNN以西方觀壟斷國際新聞報道，可惜吖，偏偏就係祖國唔畀佢「落地」讓內地人收睇，於是壯志未酬，生意犧牲！想建立一個中文CNN真係談何容易。