我唔係環保分子，但保護地球應該支持，唔用膠袋唔想蝕膠袋稅畀政府，又唔想成日帶個大袋出街喎，咁點算？買個摺叠式購物袋咪得囉。今日搵嚟7款購物袋做測試，鬥堅韌、鬥跣水、鬥大細，睇啱邊個，自己揀。
記者：王震遠
攝影：梁細權
模特兒：Eunice@StageModels
方便易收藏
男人老狗唔會用摺叠式購物袋？咪儍，我隨身都有一兩個傍身，摺叠式購物袋個Look唔多型仔？亦唔覺啫，要淨色有淨色，要圖案有圖案，要幾大有幾大，喂，家陣係購物袋唔係手袋，最緊要實用，係咪咁講先？講到實用，摺幾摺就可以收入褲袋，拎出嚟Fing兩Fing攤開就用得，方便收藏，呢啲咪實用囉。我認為，一個十全十美嘅購物袋，唔使睇款，只要夠堅韌、夠跣水兼刮極唔花已經Verygood，所以我用水淋、用刀𠝹再裝多個60磅啞鈴，又睇吓邊個袋至掂？
UNIQLO卡其色購物袋$79
尺寸15cm×21cm×2cm，係，佢最大件最重磅，淨重160g，係阻碇少少，但作為一個袋，裝到重嘢先係醒，載住60磅啞鈴好穩陣，用刀𠝹只係花少少。另一賣點係個設計，裏藏暗袋可以包番住成個袋，摺完整整齊齊，我最Buy呢一個。（c）
防水度（★★★★★）：最跣水，粒粒水珠皆清楚。
承載力（★★★★）：最硬淨，載60磅啞鈴都無難度。
耐磨度（★★★★★）：要好大力先𠝹得出刀痕，掂呀。
無印良品卡其色購物袋$48
尺寸6cm×10cm×2cm，淨量55g，MUJI購物袋防水能力唔錯，不過承載力麻麻，放入啞鈴個袋變晒形。（a）
防水度（★★★★）：良好，唔會滲入袋身。
承載力（★★★）：弱雞啲，唔好裝咁重嘢入袋。
耐磨度（★★★★★）：出盡力先刮得出刀痕。
APITA迷彩購物袋$59
尺寸7cm×11cm×2.5cm，淨重45g，呢個袋好潮，做承載力測試一步一驚心，聽住線頭線尾嘞嘞聲響，好驚佢爛！（b）
防水度（★★★）：一般，唔算好滲水，不過都唔多曉跣水。
承載力（★★）：吊耐啲個啞鈴，一定扯爛。
耐磨度（★★）：都OK易，刀痕仲幾清晰吓。
吉之島啡色購物袋$10
尺寸7.5cm×9.5cm×2cm，淨重30g，最輕都係呢個，一秤啞鈴線口位即爆，仲成邊臂斷咗，買榴槤就唔好用呢個啦。（f）
防水度（★★★）：一般過一般。
承載力（★）：好脆弱，自己睇相。
耐磨度（★）：一篤即穿，激氣。
preisenthel購物袋$50
尺寸5.5cm×10cm×2cm，淨重42g，最細件，放落袋帶出街最方便，大紅色夠搶眼。（d）
防水度（★★★★）：掂呀，好跣水。
承載力（★★）：裝60磅啞鈴變晒形，好似就爆就爆咁。
耐磨度（★★★）：輕輕一拖無刀痕，大力𠝹先有刀痕。
city'super藍色購物袋$18
尺寸10cm×12cm×3cm，淨重75g，摸上手，感覺幾厚身，不過隻色就……攞命少少啲囉。（d）
防水度（★★）：唔多掂，會慢慢滲水。
承載力（★★★★）：裝啞鈴無問題，唔會太過變形。
耐磨度（★★）：稍稍大力啲𠝹即花。
吉之島綠色購物袋$10
尺寸9cm×10cm×2cm，淨重75g，7款購物袋中呢個滲水情況最嚴重，用呢個袋去街市買餸，會唔會一路行一路滴㗎？（e）
防水度（★）：唔掂，個袋好似識吸水咁。
承載力（★★）：都係唔多掂，唔好裝重嘢。
耐磨度（★★）：袋身好硬淨，𠝹唔出刀痕。
a. MUJI（28080622）
b. APITA（28850331）
c. UNIQLO（25775811）
d. city'super（25062888）
e. 吉之島（28846888）
f. JUSCO十元廣場（22074172）