奧運聖火象徵神聖嘅奧運精神，不過所到之處卻風波不斷，香港權貴爭做火炬手醜態百出，《文匯報》噚日報道，剛卸任全國人大常委嘅曾憲梓，坐輪椅都要傳聖火！
淪為小圈子玩意
中國官方新華網都有轉載《文匯報》報道，睇嚟有關方面已內定曾憲梓係火炬手，佢已經74歲，係香港120個火炬手中年紀最大一位。據報曾憲梓為咗完成呢個神聖任務，近日不時喺家中走動鍛煉身體，由於佢行動不便，出入好多時要坐輪椅，有關方面特別安排佢唔使跑，只需要「慢步」傳送聖火50米，過過癮出風頭影張相就收工，佢自己則話如果慢步都唔得，坐輪椅都要傳火炬一程。
傳聖火淪為小圈子自己友玩意，既然一般市民無緣參與盛事，八方建議有關方面不如更改路線，安排聖火途經曾家大宅，等曾憲梓喺屋企傳聖火，免得佢太操勞，否則稍有差池唔知邊個負責。兩大華資地產商長江、恒基都有太子傳聖火，另一班霸新地，則由因「家變」而休假嘅郭炳湘上陣，可能貪佢閒來無事操得特別fit，至於傳聖火後會否復工，定係繼續「休假」則不得而知。