經常將童年豉油、豬油撈飯，差啲連書都冇得讀嘅辛酸日子掛喺嘴邊嘅商務及經濟發展局局長馬時亨，早排出席廉署舉辦嘅專訪名人活動時，又同班初中生分享呢啲耳熟能詳嘅經歷。
唔知係唔係擔心會悶親聽眾，肥馬自爆喺佢讀港大時，好積極參加學生會同學校評議會等組織，仲喺一次參觀香港監獄時，發現有啲囚犯受到不公平待遇，佢當時就寫信畀𠵱家已停刊嘅英文報章《星報》爆料，指出呢種不公平情況。
肥馬又講佢座右銘係P、H、D，P是Poor：自覺個人知識貧乏；H是Hungry：對知識嘅渴求；D是Determination：只要有決心，沒有事情做不到，勉勵青少年要逆境自強，憑着信念終可捱出頭。