利物浦球星謝拉特勾黑幫大佬女友？係呀！不過係01年嘅事情，唔怪得當時要申請人身保護令啦！我求大俠唔係亂講㗎，件事係謝拉特前女友勞倫親口同我講，仲聽到我眼紅紅㖭！
現年22歲嘅金髮美女勞倫，01年同謝拉特拍拖冇耐分咗手，之後黐埋一名叫「喪B（'Psycho'Brombley）」嘅黑幫大佬；點知當年19歲嘅謝拉特儍到玩藕斷絲連，傳SMS畀勞倫又成日打電話約出嚟飲茶，就咁犯咗黑道「勾義嫂」嘅大忌，「喪B」亦吹雞做嘢！
01年11月謝拉特架BMW俾人砸爛玻璃，嚇到呢位隊長即刻同勞倫斷絕來往，之後「喪B」又恐嚇要打跛佢隻腳，仲威脅要傷害現任老婆居倫㖭！於是謝拉特即刻為300萬豪宅安裝12尺鐵閘同閉路電視，又請前特警睇門口。
老竇搵叔父擺和頭酒
「喪B」最後點至息怒？咁就多得謝老爹為仔出頭，佢託人搵43歲黑幫「叔父」京士拿擺和頭酒，最終總算擺平件事。咁6年前江湖傳聞點會傳番出嚟？知唔係京士拿最近衰盜竊上到庭爆響口囉！聽講，主角「喪B」目前因販毒喺監度踎緊。
大家覺得謝拉特慘，定「喪B」慘啲？我求大俠就話勞倫最慘。佢目前喺一間醫院做嘢，可惜當年單嘢發生之後，全市人都知道佢跟過黑社會大佬，於是到𠵱家仲係人又冇，錢又冇。搞到今次要向英國《世界新聞》報爆料，賺番多少幫補下。
勞倫諗起當年都無限欷歔，仲話自己更適合做謝拉特老婆，「阿謝好純品，唔鍾意高調㗎，所以居倫唔啱佢！我知阿謝肯定好痛苦，佢鍾意我呢隻住家女人做老婆……」唉！聽到我求大俠眼都紅埋，希望謝拉特得閒打個電話畀勞倫，睇下有咩幫手，做人要有情有義呀！