舊年大陸股市氣勢如虹，但今年就係咁跌，大陸散戶損手難免，有內地網友喺《網易》討論區埋怨投資大陸股唔安全，中央又冇安全措施出台，於是紛紛提出搞鬼嘅股市「安全套」。
123.181.35建議，推出「局長」牌安全套，無非係想局長諗啲救市措施，除咗安全套，佢仲諗到其他「牌子」嘅產品，包括「股市」牌葉麵肥──這陣股市很綠很暴力（編按：內地股市跌，顯示牌用綠色顯示，最近經常一片慘綠）、「中國股市」牌電梯──寓意股市上落好快、「富豪」牌麻醉藥──中國富豪麻木不仁。
不過，60.184.32覺得戴乜套都冇用，「尚主席（中國證監會主席尚福林）畀嘅係『避贏套』」。218.58.77就覺得，中國股市不宜戴安全套，自然避孕就得。網友59.36.14就話：「我戴咗4個安全套都穿咗。」華華相信，穿嘅唔係個套，而係佢揸住嗰手貨跌穿買入價。benlau0214亦話：「我用7個都穿啦。」睇嚟佢跌得好甘。