政務司司長唐唐宣佈，前律政司司長梁愛詩，俾北京奧組委委任做北京奧運村、殘奧村副村長，負責香港分村嘅管理、運行、服務同保障工作，詩姑變奧運村姑，都咪話唔過癮！唐唐重大讚詩姑「有豐富的行政管理經驗和卓越的領導才能」，係不二人選。
阿爺最放心
詩姑做過律政司司長，工作其實只係同政府搞法律問題，𠵱家即是搵個律師去做物業管理！容乜易詩姑到時俾下面班馬仔亂點一通？
不過有政界中人笑說，香港奧運村乃北京保安重點，除咗人身保安之外，仲有思想保安、政治保安，萬萬不能容許香港奧運村內，有人散播藏獨、台獨思想，萬一有運動員拎面雪山獅子旗、又或叫兩聲支持藏獨，試問如何收科！
詩姑當年親自處理23條立法，對乜嘢叫國家安全、分裂祖國，絕對係專家級數，由佢做副村長，阿爺直頭放一萬個心，到時詩姑只要對班運動員，講一次當年佢撐23條立法「名句」：每個人頭上都有把刀，只係你唔知唔覺！仲有人敢亂說亂動？