樓市經過去年底至今年初一輪急升，一手貨幾被搶購一空，就連過去一直有貨尾重災區稱號嘅將軍澳，至今仲有一手餘貨嘅就只有將軍澳廣場一個盤，賣剩嘅單位亦唔係多，最新數字係8個，集中近700方呎兩房單位，呎價由4600蚊至5300蚊之間，有現樓可睇。
睇完樓搭一個港鐵站去坑口，唔使5分鐘就到區內指標商場東港城，呢個場成日都有唔同主題嘅節目或展覽，呢幾日舉辦嘅「台灣夜市節」，吸引咗唔少為食嘅香港人遠道而來，今日係最後一日，仲唔快啲去掃貨！
香港人去台灣旅行，例必去夜市掃小吃，𠵱家唔使搭飛機，就可以嚐盡當地嘅地道國民小吃，由東港城、台灣觀光協會及港澳台灣同鄉會合辦嘅台灣夜市節，來自台灣十二家著名夜市小吃店，如周氏蝦卷、度小月擔仔麵、阿輝炒鱔魚、台南蔡虱目魚等，會喺商場擺設攤檔，各名店嘅掌舵人，更專程來港主理即煮即賣小食。
呢個「台灣夜市節」，佔地7000方呎，分為四大專區，一為台灣夜市街，由台灣觀光協會嚴選出12家「台灣之最」嘅著名夜市小吃店，於場內即煮即賣。二為台灣美食廣場，過千款亁貨一次雲集香港，市民可免費試食及選購。三為台灣旅遊博覽，召集香港10家旅行社於現場設立專區，推出獨家優惠。四為台灣表演專區，由名廚主理烹飪示範及台灣民族舞蹈表演，有得食有得玩，節目豐富。
