成日聽人講垃圾食物，原來瞓覺都有「垃圾睡眠」，好多時打工仔為咗做嘢要犧牲瞓覺時間，甚至工作到最後一刻先跳上床，帶埋一大堆工作壓力去搵周公，點可能會有覺好瞓，喺床度輾轉難眠，或者不斷瞓吓醒吓，就算一晚瞓足八個鐘，起身嘅時候都會好似未瞓過咁，完全冇精神做嘢，呢種就係質素極差嘅垃圾睡眠。
會導致習慣性脫髮
成日唔夠瞓其實對健康好大影響，年輕人唔好以為瞓少兩粒鐘好閒，隨時未老先衰，近年好多研究都發現習慣咗垃圾睡眠嘅人，特別容易肥，就算無食多咗嘢，體重都會節節上升，因為長期唔夠瞓或者失眠，好易會影響到荷爾蒙分泌失調，新陳代謝慢咗，令身體無緣無故發胖。
除咗體重激增之外，垃圾睡眠仲可以造成有好多後遺症，好似令人記憶力衰退、反應遲鈍，分析力下降，嚴重影響工作表現。做嘢慢咗，自然要用多啲時間，又再瞓少啲，簡直係惡性循環。唔夠瞓仲會影響儀容，除咗大家都好熟悉嘅黑眼圈外，原來會導致習慣性脫髮，朝早起身梳頭發現甩頭髮多咗，就係瞓得差嘅警號。
工作壓力人人都有，識得點樣減壓先可以晚晚進入甜蜜夢鄉，我醫神教路瞓覺之前一、兩個鐘唔好再睇文件或用電腦，畀個腦冷靜吓，聽吓柔和音樂，最緊要係定時定候瞓覺，工作真係太多，寧願偶爾提早一、兩個鐘起身做，總好過成日捱更抵夜。
blog主：醫神