一家老牌中資公司、一個行業龍頭，上市未夠一年，PE只係幾倍，有這樣「筍」嘅公司，冇錯，就係新華文軒（811）。
新華上市後，筆者曾作推介，主要係認為佢在圖書零售分銷行業佔有龍頭地位，將可大展所長，但10個月過去，新華表現令人失望，股價非但「潛水」，且更跌到一個令人「眼寃」的水平。大跌既然跌到過晒龍，掉轉頭，大升亦一樣可以升凸，近日股價雖由2元多回升上3元多，但仍係好偏低，以中線投資為出發點，只要股價去番上市價水平，已可賺成個開。
新華去年5月底上市，發售價5.80元，7月24日最高見8.70元，最低上月20日見2.16元。07年（12月年結）的上半年，營業額9.97億元人民幣（下同），跌7%；盈利1.68億元，升21%，每股盈利0.21元，升10%；盈利增長來自上市凍結認購資金，利息收入約2900萬元。估計全年盈利3.6億元，升18.8%，每股盈利37.4分（折41港仙），PE只係7倍多，龍頭公司同基金股少有如此低PE者，與外國同業平均的20倍比較，更顯得好吸引。
PE遠低於外國同業
新華H股發行4.4億股，由於生意模式獨特，又係龍頭，因此好快就成為基金股，現時五大基金持股近四成，另外冇申報的亦揸咗唔少，貨源歸咗邊，只要基金一郁手，股價就會大升。
基金揸重新華，主要係看好其在國內出版發行企業的兼併、收購和重組方面佔有優勢，有機會發展成為全國最大的零售網絡。基金不會看錯，但新華擴展的步伐卻遠比預期為慢，到如今，只落實兩宗小收購，令手頭上仍有超過20億元現金未曾動用。
貨源盡在強者手中
外間對新華不滿的情緒，已反映在股價上，但基金未有因此而減持，顯然對其前景仍充滿信心，愛之仍深。
有小道消息，話經多方多次溝通後，公司已表明會改變作風，發憤圖強，相信一連串的大中型收購將會陸續有來，將資金作出最有效運用，為股東謀取最大利益。
新華貨源盡在強者手中，有業績支持，也有注資同兼併概念，現水平入市揸中長線，有頗大機會可以賺一個，或甚至兩個開。