早幾個月由恒隆地產（101）過檔到碧桂園（2007）做CFO嘅伍綺琴，最近接受咗香港會計師公會月刊嘅訪問，佢透露喺1月中上任就要馬上處理碧桂園發行43億銀人仔可換股債券嘅刁，當時佢同兩個同事忙到喺屋企都要做埋公司嘢，最後單刁三個禮拜搞掂，雖然好辛苦，但伍綺琴覺得好值得，因為夠晒挑戰性。
伍綺琴話細個已經好鍾意數字，仲諗過要做數學老師，但後尾發覺原來管理都係一件有趣工作，所以最後就做咗會計師。伍綺琴畢業後第一份工喺德勤度做會計trainee，一做就做咗11年，當中學識點樣同管理層溝通。之後佢就去咗港交所（388），離職前做到上市科高級總監，喺港交所十幾年，最大感觸係見證住港交所由200家上市公司，增加至1000家上市公司。
講做人哲理，伍綺琴嘅宗旨就係寧願讓步，尋求共識，亦都唔會輕言放棄，佢仲話一旦份工做得太長，人就會開始懶散，所以自己都不時作出檢討，每5年就會檢討工作目標，唔知係咪咁，伍綺琴喺恒隆地產度打咗近5年工，就轉咗去碧桂園呢？
伍綺琴今年50歲，希望10年之後退休，不過唔係話退休後乜嘢都唔做，都會諗住做吓非執董，幫啲公司改善企業管治。