放飛機梗係唔好，放嗰個仲係堂堂總統，就更加唔啱數。但噚日喺台北就上演咗一幕台灣候任總統馬英九臨時臨急放港記飛機嘅戲碼，成班香港行家專程去台北採訪小馬哥，點知新聞採訪唔到，反而變成台灣媒體嘅新聞題材同晚報頭條。
話說小馬哥仲有個多月就會上任，香港唔少媒體都想約佢做訪問。佢本來應承上周四（4月10日）搞一場專畀香港傳媒嘅「共同專訪」，但上禮拜初又話改到噚日星期日朝早11點。
好喇，到咗噚日朝早十點幾，成班香港行家包括八方，坐晒響國民黨中央黨部等小馬哥，仲有大批台灣同行喺度「旁聽」，點知佢嘅發言人羅智強喺10點半左右出現，宣佈臨時取消個採訪，原因係「博鰲」因素喎！
記者反成頭條人物
佢解釋，安排今次採訪時，馬英九嘅幕僚冇考慮埋候任副總統蕭萬長參加博鰲論壇呢單嘢，但近日蕭萬長同胡錦濤嚟咗個蕭胡會之後，傳媒嘅焦點集中晒喺博鰲，估計香港媒體亦會猛問蕭胡會嘅嘢，因此佢哋朝早九點半開會討論咗半粒鐘之後，決定向小馬哥建議臨時取消個採訪，小馬哥亦同意，決定等蕭萬長返台後，今午先一齊出嚟見記者。
羅智強向香港媒體道歉後離開會議室，在場嘅台灣記者同十幾廿部電視台攝影機即刻衝埋班港記度扑咪，問我哋係咪好錯愕、有冇不滿等等。最好笑係八方朝早9點幾先打過電話畀安排採訪嘅一位馬蕭辦職員，佢仲同八方確認採訪照原訂時間舉行，勢估唔到呢個安排咗成個禮拜嘅採訪會喺開波前半個鐘先取消，仲話係因為一個一早已知嘅博鰲行程！
班香港行家梗係㷫，有啲仲訂咗下午機票回港，結果台灣各大電視新聞台不斷播馬英九放記者飛機嘅新聞，連晏晝出街嘅《聯合晚報》都以頭條大字標題：〈港媒聯訪馬記者會突喊卡為甚麼？〉報道，仲配埋張港記個個表情錯愕嘅大相，key埋「台灣常這樣嗎？」「晚上住那？」嘅對白落相度。
到咗傍晚時分，又傳出國民黨準備提早今午個香港媒體記者會，而港記多留台北一天嘅住宿開支等，會由佢哋一力承擔。不過經過噚日，八方認為一日未見到小馬哥，一日都唔好信住。
mailto:[email protected]