油價在110美元高位波動，好多人估油價有機會升上150美元，星俠無意見，關注油價上落只係想從中觀察相關受影響股份，以捕捉短炒機會。
油價難長期高企
工業股一向並非我杯茶，散戶亦毋須花心機，因為即使在去年港股牛市「大時代」，工業股表現亦乏善可陳。油價升上高位，並未帶挈石油股大升，普遍更要跌，呢種現象最令捧場客頭痕。另外，油價高企，亦窒礙航空股走勢。
不過，美國經濟因次按問題已經內傷，萬一經濟急速放緩，對原油需求減少，油價可能大跌，雖然何時發生冇人知，但若油價逆轉向下，原本受累的股份或重受市場注視而翻身，內地航空股是其中一分子。
人民幣升值亦對內航股有利，事關幾隻內航股外債主要為美元，其中南航（1055）負債比國航（753）及東航（670）多，最受惠人民幣升值，如油價後市真的回落，即變成雙重利好。南航剛公佈3月份載客量僅微升5.9%，達486萬人次；近日股價未擺脫弱勢，只宜待調整低吸持中線，目標8元。