小妹呢排真係有啲外遊命，啱啱喺台北宜蘭玩咗一個禮拜，去完礁溪浸完溫泉，又去埋毗鄰嘅蘇澳浸冷泉，前幾日返到公司，同事阿冼都話我啲皮膚白滑咗。梗係啦，蘇澳冷泉有天下第一奇泉之稱，全世界只有兩個，另一個喺意大利，地底湧出嚟嘅泉水溫度長年保持攝氏22度，陰陰寒寒凍到入心入肺。不過，今次旅程最大驚喜反而係佢哋嘅桃園機場。
啲同事聽我咁講唔係好信，話桃園機場又細又舊又冇嘢睇。小妹都以為係，但查實桃園機場分為第一航廈同埋較新嘅第二航廈，我哋搭機返香港係短途機，主要用較舊嘅第一航廈登機，第二航廈主要係長途機，而兩個航廈係分開嘅。
話說小妹入咗第一航廈禁區仲有個幾鐘頭先上機，無所事事周圍逛，行行吓先知禁區有通道行去第二航廈，嗰度燈火光猛，名店林立唔在講，仲有蘭花展睇，又有客家人攝影展睇。但講到最大驚喜係設有一個HelloKitty候機室，啲座位全部有HelloKitty公仔，仲有巨型嘅HelloKitty滑梯、電話亭等等，細路仔固然玩到癲晒，大人就係咁影相。仲有，呢個候機室唔係得個樣，係真正候機室，登機閘口仲有HelloKitty公仔迎送，個個入閘登機都影番張靚靚照。
逢周一至周四刊出