立法會政府帳目委員會今個月底公開調查旅發局大花筒報告，呢份報告花咗成半年調查，議員落重藥追究前主席周梁同前總幹事臧明華，八方聽聞部份帳委會成員審完呢單大醜聞後，耗盡心血需時休養，所以上星期審計署發表新一份審計報告，佢哋都唔係太熱衷跟進，有人仲想提早收爐。
據了解審計署建議帳委會跟進調查產業署浪費旺角靚舖位，同美沙酮中心使用率偏低問題，但有議員認為呢兩單嘢唔係涉及數以十億元計公帑，唔一定要公開聆訊審問官員，書面解釋都可以，加上立法會仲有幾個月就收爐，大家無心戀戰，不如提早收工。當然亦有議員唔同意，事關公開聆訊有曝光機會，唔好嘥。