華華呢幾日去咗越南，有機會同越南製造加工出口（422）行政總裁陳邦雄傾偈，提到越南近年成為熱門嘅新興投資市場之一，連全球巨富微軟主席蓋茨，舊年4月底都特別到越南河內考察兼旅遊，當時各大傳媒都有廣泛報道，不過，陳邦雄同華華講咗單蓋茨越南考察期間嘅笑話。
話說蓋茨抵達越南後，留意到越南街上嘅招牌，好多印有「COM」，作為微軟創始人，蓋茨自然對呢個英文字好有feel，仲對越南嘅互聯網公司發展得咁迅速感到好驚訝。點知，蓋茨眼中嘅「COM」同越南人嘅「COM」意思好唔同，陳總話，蓋茨見到嘅「COM」喺越南話解作「飯」，「COM」公司即係賣飯嘅食肆。
諗計抗通脹
呢個笑話真定假？冇必要考究，不過華華可以證明，越南的確好多招牌有個「COM」字，而且都係掛喺食肆。
華華仲知道，香港啲米貴，越南亦唔例外，因為越南亦受到全球高通脹問題困擾。
陳總話當地今年首季通脹率達20%，政府透過加息遏抑通脹，高峯時加到12厘息；又禁止大米出口、限制燃油漲價。物價貴唔緊要，最緊要工資追得上，陳邦雄話，舊年越南製造已經向越南嘅員工加薪20%，但人工仍然比大陸員工低三分之一至一半。
電郵：mailto:[email protected]