人仔兌美元，呢期直情坐火箭，買人仔升值受惠股，買亨泰（197）。亨泰呢期啱啱公佈08年半年度（12月底止）業績，純利升咗74%到1.27億銀。呢家主打祖國物流消費品及農產品分銷嘅企業，一則受惠祖國經濟高增長，多咗肯使錢嘅中產消費族。二則，特別係上年下半年以嚟，人仔起勢咁升，大大提高咗祖國同胞對「舶來品」嘅購買力。亨泰食正呢兩瓣大好因素，純利增長好自然坐火箭。亨泰08年度純利係咁易翻半番到2.8億銀，預期PE都係得6.5倍。
又家陣揸咗亨泰嘅基金大孖沙，持貨量貼近50%水位，唔係嘢少，而亨泰今年以嚟，兜咗組雙底，對上星期五已經貼住頸線等爆，相信圖表派亦話好靚仔。買亨泰，博雙底目標價1.44元，現價（1.18元）回報率22%，買亨泰基本因素，以預期PE10倍做目標，要翻半番到1.81元。
景福有point炒一轉
港交所（388）由3月低位到家陣，彈咗近30%，景福（280）有point炒。景福上年3月底止，揸咗187萬股港交所，之後有無增減，仲未有公佈，先以呢撼股數參考計吓數。計埋呢期反彈，港交所由上年3月尾到家陣，升咗近98%。景福喺港交所投資嘅額外增值，上到近1.4億銀，等於景福每股0.32元，景福好肥仔。呢轉炒港交所回升效應，短打博景福升20%到0.97元，未有耐到NAV兩蚊水位，但已經有魚有肉。