劉德華最近到泰國拍攝飲品廣告，拍攝期間更落手落腳幫手替學校髹油，他謂未當明星時做過很多工作，故此髹油絕對難不到他。在廣告中化身老師的他，跟小朋友扯大纜時被拉到一仆一碌，場面搞笑又溫馨。
劉德華早前到泰國拍攝道地白茶廣告，並搖身一變成為教師，在小村莊中教導來自世界各地的小朋友，教育他們人生必須充滿夢想，華仔說：「最難忘係睇住間學校兩晚之間搭起，本來導演一早搵到呢間學校，但我到埗後，導演話因為泰皇到訪，所以要拆咗重建。我哋見到實景變咗平地，大家都呆咗，大家做咗最壞打算，可能要改拍其他內容，但諗唔到泰國人咁犀利，兩日之內重建番間學校，趕得切畀我哋拍攝。」
捱過苦乜都識做
為了配合主題，校舍顏色需要純白色，所以工作人員趕工髹白油，華仔眼見各人這麼努力，也忍不住要幫忙髹油，手勢還似模似樣，華仔向工作人員說：「唔好以為明星乜都唔識做，我未做明星前，做過好多工作，讀書時兼職同人剪頭髮，暑期工又做過地盤、鐵窗搬運都做過，髹油又點難到我！以前我細個半夜4點起身幫屋企間士多煲粥準備賣早餐，經歷咁多嘢先好，夠多姿多采嘛。」
扯大纜一仆一碌
在廣告中，華仔要與多位小朋友做對手戲，有時一起上課，有時在草地玩扯大纜，還以一敵十多個小朋友，卻被拉到一仆一碌，連人也跌倒地上，不服輸的他召集大隊人馬抵抗，才反敗為勝。廣告中還有名小女生，大家都叫她做小樂基兒，連華仔也讚她漂亮。
撰文：林妃