上市公司主席通常鍾意玩啲乜？相信代表身份象徵嘅高爾夫球最多人玩，不過亦有老闆口味另類，包浩斯（483）主席黃銳林最鍾意踩單車，當然唔係喺單車徑踩，佢最初迷上落山單車，跌傷咗幾次後改玩公路單車。佢形容將包浩斯搞上市，十足參加單車界國際大賽──環法單車賽。
黃銳林話，環法單車賽同包浩斯上市有共通點，「入選環法賽已經唔易，要考牌要睇表現，又要有車隊搵你，要求甚高；入圍後，單車手都要發力創造成績，要有表現先可以跑第一。上市難度一樣，申請上市已經要過好多關，上到市亦要做出成績，對股東有交代。」
佢坦白話，05年上市後壓力大咗，因為股東有期望，玩公路單車幫佢減壓，亦畀佢一啲啓示，「例如同朋友鬥車，自知踩山路叻過平路，咪撩對方鬥山路囉，要承認缺點，然後揚長避短嘛。」
佢話玩公路單車後，諗嘢都唔同咗，唔再一味由壞處諗，「好似睇舖位見租金貴，以前會擔心做唔住；𠵱家會諗租貴可能係位置好，係就唔怕租，落力啲做生意咪得囉。」