全港首間屋邨小學、東頭邨天主教溥仁學校，係今年9間因收生不足而被殺小學之一，校方星期三舉行救校行動，希望扭轉命運。呢間1965年創校嘅屋邨小學卧虎藏龍，中央政策組顧問、禮賓府心戰室負責人兼特首煲呔愛將劉細良係舊生，港大感染及傳染病中心副總監何栢良係佢同班同學兼老友。
細良話唔希望母校被殺，若果校長黃振宗要佢幫手，佢一定會出力救校，原來佢細個時住東頭邨22座，每層都同學校走廊連住，最懷念打風落雨日子，唔係因為唔使返學，而係「唔使濕身就返到屋企。」
何栢良則話𠵱家不時都會返東頭邨，好唔捨得學校停辦。佢同細良老友鬼鬼：「我哋一齊打乒乓波、玩跳飛機。」何栢良住第1座，屬於設備較差嘅徙置區式設計，細良住嘅22座則較新型，唔止羨慕細良落雨返學唔使濕身，放學仲快啲返到屋企㖭。