香港妙思吟（Museum）如果有現象可言，有6個字，當烏蠅遇上蚊。
去年遊過新加坡驚覺人家很願意搞文化，將20多個博物館湊在附近，弄份一目了然文化藝術地圖，博物館夠大夠博。我們？官方及私人博物館估你唔到大大話話也有20多個，但規模蚊型，應了梁文道一句，要介紹香港文化旅點你願意帶他們逛嗎？結果，蚊型博物館只好拍烏蠅了。
記者：劉嘉蕙
攝影：王文忠、劉嘉蕙
插圖：WillNg
市區雞肋蚊
食之無味棄之可惜，巿區博物館未必博物未必旺丁，但未步楊修後塵皆因都位處港鐵沿線徒步幾分鐘路程，飄過瞄瞄幸保不死。
1.葛量洪號滅火輪展覽館 半世紀船業
葛量洪號滅火輪於1953至2000年服役，見證香港上世紀50年代的造船業成就，香港歷史博物館將其原隻保留，並在底部建展覽館，介紹19世紀以來的海上消防歷史。毗鄰維港景色怡人，是周末一家大細玩樂好去處──以上非鱔稿，採訪當天，估佢唔到小小滅火輪，真係船頭逼到船尾，細路玩到𠵱嘩鬼叫，一句讚美絕不能吝嗇。
地址：鰂魚涌公園內
電話：35806770
烏蠅指數：★☆☆☆☆
2.香港規劃及基建展覽館 唔知做蚊
芸芸咁多館，呢個，見到個名真想𢱑頭？仲開正香港大會堂隔籬。展覽勁互動，入場送張貼紙你玩黐地圖，入去㩒粒掣都着成行燈。最好玩一角，叫旅遊萬花筒，伸個頭入去，揀香港名勝，如大佛、金紫荊，一二三笑，即影即有──電郵去你屋企！唔使錢，很有Photoshop「前身」姨丈幫你玩Key頭落巴黎鐵塔的味道。你知道我想說甚麼了，咁展覽其實係畀香港人睇定遊客睇呢？又其實叫「規劃及基建」是多麼趕客？不過場館冷氣開放，梳化舒服，度暑天正呀！
地址：中環愛丁堡廣場3號地下
電話：31021242
烏蠅指數：★★★★☆
3.羅屋民俗館 Backto清朝
羅屋，姓羅的客家人之屋也，有羅氏於清亁隆年間在今柴灣一帶起村屋一座，屋內保留大部份客家人家居裝潢，如廚房、客廳、木製嬰兒車等，有個假婆婆坐在裏面，參觀像家訪──亦都僅止於家訪。堂堂民俗館，細到完全不起眼，3步行完！係，細係冇罪，但旁邊資料館亦欠睇頭，流露「搞來冇乜謂唔搞又好嘥」的雞肋氣息。勝在柴灣港鐵站B出口行5分鐘就到囉。
地址：柴灣吉勝街14號
電話：28967006
烏蠅指數：★★★★★
4. 李鄭屋漢墓 別有洞蚊
1955年，工人在深水埗徙置大廈施工期間發現的漢代古墓，並出土58件陶器及青銅器，1975年該址建為博物館。博物館有兩個展覽廳，以及一道樓梯通往墓室，墓室觀賞小平台僅容兩人，但隔玻璃觀墓，甚有「別有洞天」之感，不過又係10分鐘睇完有突，工作人員多過客。
地址：深水埗東京街41號
電話：23862863
烏蠅指數：★★★★☆
5.茶具文物館 公園增值
香港許多蚊型博物館，都依附公園而生，大有「博你行開公園都嚟望兩眼」況味，成為公園文康娛樂設施一部份、增值服務之一，講真都幾凄凉。位於香港公園內的茶具文物館，是當中表表者。84年1月成立，前身為駐港英軍總司令官邸，兩層大樓屬希臘復興期風格，有逾160年歷史。附設的羅桂祥茶藝館擺放茶具及印章。
地址：香港中區紅棉路10號香港公園內
電話：28690690
烏蠅指數：★★★☆☆
郊區摩登蚊
門內添「活」字，楊修衰恃才，但懂人心意卻一如估你唔到的鄉郊博物館，以為「豆泥」，實則摩登。
6.屏山鄧族文物館 鄧達智「坐館」
元朗屏山是香港歷史最悠久的地區之一，而鄧族是當中大氏，12世紀開始遷居屏山。由百年舊屏山警署改建而成的屏山鄧族文物館於07年落成，介紹鄧族民風。圍繞文物館有屏山文物徑，聯繫聚星樓、鄧氏宗祠等建築物。在港台節目及鄧族代表鄧達智力谷下，文物館開放9個月有逾10萬人參觀！梗係，空間設計有心思，感覺大方而摩登，展覽內容亦富趣味，如加插社區文物展覽室部份，找英中同學仔訪問私塾同學仔，比較今昔學校差異，能夠聯繫歷史。
地址：元朗屏山坑頭村（西鐵天水圍站轉K65巴士）
電話：26171959
烏蠅指數：★★☆☆☆
Nottoo蚊
蚊型妙思吟行完都唔覺行過，不能怪人人走去行Mall。當然，部份響朵博物館規模大如Mall，點都要吟一吟。
港島
7.香港海事博物館
分古代及現代館，詳盡介紹航運歷史，設計精美，是本港較受歡迎的博物館之一。
地址：赤柱廣場美利樓地下
電話：28132322
8.懲教博物館
位於海事博物館附近，有得睇絞刑台及玩坐監。
地址：赤柱東頭灣道45號
電話：21473199
9.香港賽馬博物館
除賭馬和奧運馬有人鍾意看齋馬的嗎？
地址：跑馬地快活看台2樓
電話：29668065
10.香港醫學博物館
前身為細菌學檢驗所，96年變博物館，03年增設草藥園。
地址：香港半山區堅巷2號
電話：25495123
11.香港海防博物館
由舊鯉魚門炮台修建而成，其設計曾獲00年香港建築師學會周年大獎銀獎。
地址：筲箕灣東喜道175號
電話：25691500
12.警隊博物館
網頁簡介話有毒品展覽廳及三合會展覽廳，咁鬼馬？
地址：香港山頂甘道27號
電話：28497019
13.孫中山紀念館
星光大道的手印唔算，孫中山紀念館是香港少有的人物博物館，睇完行埋孫中山史迹徑啦喂，雖然後者個名改得衰啲。
地址：中環半山衞城道7號
電話：23676373
九龍
14.香港歷史博物館
間中的專題展覽亦出色，順帶一提古代錢莊銀行展玩到5月尾。
地址：尖沙嘴漆咸道南100號
電話：27249042
15.香港文物探知館
甫出尖嘴地鐵就見到，上吓WIFI都抵。
地址：尖沙嘴海防道九龍公園內
電話：22084400
新界
16.上窰民俗文物館
位於西貢郊野公園內的客家小村，建於19世紀，佔地500平方米，咪就係去呢個唔使去羅屋囉。
地址：西貢北潭涌自然教育徑
電話：27926365
17.香港文化博物館
歷史、藝術及文化綜合博物館，Update得密，題材吸引，記者心水。
地址：沙田文林路1號
電話：21808188
18.三棟屋博物館
二百多年歷史的圍村重建，本身亦為法定古蹟，中小學旅遊熱點。
地址：荃灣古屋里2號
電話：24112001
19.香港鐵路博物館
介紹本地鐵路發展，展出舊火車站古蹟、窄軌蒸汽火車頭等，感覺Retro。
地址：大埔大埔墟崇德街13號
電話：26533455
