由梁祖堯主演嘅舞台劇《攣到爆》前晚喺演藝學院作第四度公演，去捧場嘅藝人有林嘉欣、at17、林一峰等人，而謝安琪同老公張繼聰更加拍拖到場，不過喺記者多番要求下，佢哋依然唔肯合照。
大玩禁忌言行露骨
《攣到爆》一劇嘅話題唔單止敏感，而且梁祖堯喺台上嘅舉動亦都大膽露骨。梁祖堯除咗多次講粗口之外，佢仲模仿男同性戀者親熱時嘅呻吟聲、同埋喺台上食煙，不過最大膽一幕，佢只係用毛巾包住下身，喺燈光慢慢咁校暗嘅情況下，佢連條毛巾都剝埋，露出成個屁股，唔單止係咁，另外有一幕佢仲伸埋隻手入褲浪㖭。
此外，梁祖堯更加大玩禁忌，將疑似藝人淫照事件擺上枱，對白精警又明寸男、女主角陳冠希同埋鍾欣桐(阿嬌)。劇中講述梁祖堯飾演一名基界明星基米高，佢話導演安安搵佢拍露蛋巨獻《色戒2之靈界》，不過佢最後推咗唔拍，佢解釋話：「安安搵嗰隻疑似藝人愛廸生做另一男主角，諗起都反胃。嗰隻愛廸生乜嘢料大家見過晒啦。」至於疑似藝人淫照嘅另一位主角阿嬌，梁祖堯亦都唔放過，佢扮演另一個角色Michael揶揄阿嬌，佢話：「初戀嗰段日子我真係好天真好儍，衰天真呢家嘢真係歷久常新，唔使我多講啦。」
演出完畢後，梁祖堯接受記者訪問時，佢俾人問到咁update將淫照事件加入劇中，他表現得有啲避忌，仲好強調嗰一部份係純屬虛構喎！
採訪、攝影：駱華齡
