黃偉文自我簡介
填詞人，其實最鍾意買嘢，最憎寫字，星期日盡可能唔寫字，去買嘢。
我一早領教過這間bakery，而且畀過很多次機會，但麵包、西餅、蛋糕全部唔掂，得個甜字，甚麼香味都沒有，而且件件脫水，質感粗糙，有理由相信他們用的原料並非麵粉，而是鞋底，攪碎的鞋底。
真不明白為甚麼這種水準的店居然能開在這麼高級的商場幾年而不執笠？上過當一次的顧客為甚麼還會返轉頭？
我一早發過誓不會再幫襯。
只可惜今天傍晚太得閒。上一樣工作比預期中早完結，和朋友約定的飯局又未夠鐘，漫無目的逛商場殺時間，不小心又路過這間餅店，最衰那個擺在當眼處的新雪櫃，最衰近排愛上吃cupcakes的我……一見這8個英文字母擺在一起，就忘記了以往的恩恩怨怨，乖乖折服於蛋糕頂的七彩忌廉與糖碎，無骨氣地奉上銀両，求大爺賜我cupcake一件！唔該！
……10:00，11:20，00:35，01:03，02:15，終於在我揭開盒蓋偷望了五次又冚番埋之後，夜半3點正，趕稿趕得夠辛苦的時候，我懷着恭敬的心情，享用渴望了整個晚上的可愛小cupcake，擘大口之前還專誠將它放在碟子上欣賞了五分鐘，以示它比「等三分鐘」的杯麵神聖呢！
頂！一咬落去，又粗又鞋，咦~原來係muffin嚟嘅！
原來佢哋在muffin上面唧咗五顏六色嘅cream，再「沈」啲七彩朱古力落去扮cupcake。等我的味蕾完全預備好接受又鬆又軟的忌廉按摩，真正埋牙肉搏時卻遇到粗微粒兼少少刮脷的鬆餅……你話幾錯愕，幾失望呢？
真係衰到冇人有！衰過電咗髮扮公仔麵的意大利粉，今次，唔係講笑，我真係扯火！
雖然法例無規定要用雪芳蛋糕（chiffoncake）做底的杯狀東西才可以叫自己做cupcake，好，我咬你唔入（不單是指法庭上咬唔入，Iliterallymeanit!），但你無端端脫離大眾的共識，將基本材料偷龍轉鳳，我就有權懷疑你班師傅根本只識焗muffin但又見cupcake呢期紅想賺埋人哋嗰份錢，才出條「掉包」的嗱渣橋。
又或者，擔心自家的鬆餅唔夠好賣，所以才將它們畫到鬼五馬六企圖魚目混珠。
其實muffin本身也有其粗粗哋的風味，何必放下本色畫個大花面扮cupcake？穿煲固然唔型，唔穿煲自己行出嚟都恐怕會有點尷尬吧？
況且，呢個世界又不只得cupcake好食，何苦係都要扮佢呢？
大龍鳳才阿姐
筆鋒一轉，轉到舊年在日本幾紅的創作型女歌手AngelaAki，在TSUTAYA唱片架上發現這名年過30的企理中女，已有舒服感覺，再看今年她出席紅白時自彈自唱的那一身素服，更是驚為天人，牛仔褲converse鞋紅白牛角袖campustee，加副有性格的玳瑁色膠框眼鏡，當然invisiblemake-up是有化的，頭上的秀髮也是後天加工才如雲，但整體地你收到的訊息就是「一個氣質女星的誕生」。
環繞地球再數，我們要給她找些同類也不難，台灣的陳綺貞、美國的NorahJones，甚至更早期的LisaLoeb都是這一派整整齊齊形象上絕不搞呢搞路的氣質型女歌手。
為甚麼，香港在這方面咁缺貨呢？
以形象清爽馳名的彭羚小姐，剛走紅的幾年，我有天發現她衣櫃裏有件鮮紅色蘇格蘭格子釘滿珠片的低胸短裙，我話：「嘩，點解你會有條咁娘嘅登台服嘅？」
「我要上香蜜湖登台搵錢吖嘛，如果唔着到閃晒咁上去，上面啲觀眾會話冇嘢睇，回水㗎！」美聲天后講出登台血淚史後，我很感動，所以跟手幫佢喺心口扣多兩件牛脷酥咁大的水晶心口針，以示體諒。
咪搞謝安琪
這種「大龍鳳先夠阿姐」的風氣，不知是香港傳上去的，還是由大陸回流香港的，總之唱片公司又信了，電視台監製又贊成，演唱會導演亦收到風，連帶香港歌手的私人化妝師髮型師造型師都唔敢阻手阻腳，總之任何女歌手要登台時，都要在表演者身上大興土木一番，滿頭插花植樹起埋主題公園才放她們上台表演，惟恐插少條雞毛，搽少層閃粉就會被兇猛的觀眾柴台，事後要被記者寫唔尊重大會……卒之，而家你睇，但凡在大show出場的女歌手身上總是有幾嚿嘢，頭頂一嚿，膊頭一嚿，有時心口再兩嚿，腰間再加一抽，下身甚至一大嚿……
人嘅嘢，不一定每位都是cupcake呀，如果你咁啱係muffin嗰隻，就毋須搞呢搞路來僭建俗眼中的「星味」，就算不是天生大美人，歌唱得好表演得妙還是有種迷人的氣質的，齊齊整整亁亁淨淨，最多着件現實世界裏的靚衫，都可以很清麗呀。清麗都係麗，唔使一定要艷麗或者妖麗啫？
冇錯，有啲歌手的確要穿起「行裝」演出才有「上身」的風采，但謝安琪、王菀之、泳兒的有關同事，下次可不可以唔落咁重手呢？佢哋幾位唱得已經咁好聽咁有性格嘞，齋畀我聽歌已是無上享受，使唔使吓吓神功戲咁出場呢？
不過，如果你話我知佢哋三位下個月紅館開個唱，叫我幫手做styling，你估我又敢唔敢唔畀啲珠片裙佢哋着呢？
不如就由今日開始，試吓唔好低估香港觀眾的品味與接受能力。
Textby黃偉文
本周金句
當年電影《說謊的女人》上映，有觀眾彈戲裏劉嘉玲的造型唔夠靚，美指張叔平的反應是：「咁佢個角色係應該唔使咁靚㗎嘛」，「啱角色身份最緊要，使乜一定要靚唧」。