【澳門直擊】意大利名牌Gucci在澳門永利開設專門店，前晚舉行開幕酒會及晚宴，吸引賭王女兒何超瓊、孫女何家華、任達華與太太琦琦等捧場。Gucci請來一班名模助陣，首次到澳門的台灣名模林嘉綺，穿短褲大騷44吋半長腿，同場的樂基兒近期密密出騷，前晚示範恤衫卻不慎露出「缽仔糕」。
「搏命做嘢搵錢」
樂基兒說：「因為5月尾先返學，𠵱家唔使開學，時間flexible啲，可以搏命做嘢搵錢。」她透露11月完成學業，未有計劃繼續攻讀博士課程，她笑說：「之後咪瞓吓食吓囉。」問她可會全職幫黎明做styling？她說：「唔會幫男友，佢本身有自己嘅stylist，我唔會插手，同埋佢眼光好好，佢都好緊貼時裝潮流。」
任達華勁賺人仔
至於即日來回台灣的林嘉綺，未有機會在賭場搏殺，她直言自己一向無偏財運，只能辛苦靠正財運，而今年正財更在海外，所以要密密到外地𢱑銀。
對於近期人民幣狂升，任達華與琦琦早在內地買樓，華仔更儲落不少人仔，他說：「我10年前開始儲，嗰時仲係116（100港元兌116人民幣），因為我當時成日返昆明、新疆影相，儲埋方便買機票、食住，估唔到呢份愛祖國嘅情懷，會令我啲錢升值，唔計收息，𠵱家應該升咗20幾個巴仙。」
上海名模姚書軼帶病上陣，她謂人民幣升值，令她要給多些家用予居於上海的母親，連供內地樓的開銷都大增。
採訪：林妙萍
攝影：葉君海
話你知：永利Gucci店 專吸賭客
Gucci在澳門永利賭場名店坊內開設的專門店，佔地2,588平方呎，主打casino豪客，特別以矜貴皮革手袋坐鎮新店，如超過10萬港元的鱷魚皮手袋，以及5萬多元的鴕鳥皮手袋等。
