住在三藩市灣區，日日揸車往PaloAlto返工嘅投資L上星期來電，叫左丁山與一位中山廠家W約吃午飯，傾一個項目。左丁山不彈此調久矣，不過投資L叫到，點都要與中山廠家W有一個約會。與投資L講完電話唔夠五十分鐘，中山廠家W已經來電，約好星期二中環吃午飯，佢會自中山往澳門，晨早坐船來港，吃完飯就返中山。
此之謂生意全球化，PaloAlto、中山，與香港，毫無隔膜，電話與電郵將各方人等聯繫起來，彼此相隔太平洋有等於無，再加上自由行簽證，珠三角人士來港澳話都冇咁易，他日港珠澳大橋落成，我哋揸車去中山吃餐飯，起身就行人啦。財務A最近常駐廣州，叫我哋一班每月晚餐例會會員坐直通車上廣州食靚嘢，食完就坐直通車回港，佢話晚上十一時就可以返到屋企瞓覺咯喎。左丁山話唔多習慣咁樣頻撲，俾人笑係香港大鄉里。
到咗星期一中午，酒家突然來電，話有一位W先生摸上去搵左丁山，唉吔，我哋約咗星期二噃，點解W先生記錯咗，星期一就嚟到？呢日明明賓架P約好去「嶺南會所」㗎嘛。惟有放低工作，立即走去酒家見廠家W，介紹佢哋食著名皮蛋、燒鵝、太子撈麵，自己食碗魚生粥就鬆人，攞咗一啲資料，睇完後再約過，慢慢再傾。一個屈尾十就跑去「嶺南會所」，賓架P等成班老友已經食完飯，爆完料，冇嘢再傾，等左丁山冇材料寫稿喎。呢間會所冇去好耐，以前靚女賓架D嘅父親係廣州嶺南大學畢業生，因此靚女賓架D亦係「嶺南會所」會員，經常請左丁山到此吃飯。賓架D早已移居新加坡，成為資深privatebanker，大家冇見面好耐咯，正是睹物思人，上到會所，就想起賓架D，不知佢近況如何呢？
賓架P攞過嶺南大學榮譽博士，自然成為「嶺南會所」會員，呢間食堂炒幾味甚有鑊氣，水準一向唔錯，以後傍住賓架P，又多一個中環吃飯好地方，可惜佢約你容易，你約佢就分分鐘排期在一個月後，唔係咁易有得食。