商務及經濟發展局局長馬時亨係股票經紀及私人銀行家出身，當然識得市場波動，隨機應變，反應要快嘅道理。賓架馬做局長不經不覺已經有六年，睇住佢愈做愈順手，高度進入角色，背後AO對佢呢位局外人有乜評價，我哋唔知，但從佢嘅公開、公眾表現嚟睇，馬局長身手靈活到極，除咗佢自己唔多熟之科技、廣播政策之外，交足功課啦。
譬如最近米貴，食米供應緊張，馬局長第一時間巡超市做騷，跟住見泰國駐港總領事，與食米入口商及超市開會，得國家商務部長承諾供應大陸食米，工夫做到十足十，起碼保證咗食米供應不缺，大家唔使搶米先。至於米價，馬局長答得有分寸，話視乎市場供求而定，證明佢知道問題所在。
反而一啲矇查查議員，只曉評彈，其實唔識嘢。例如王國興（工聯會）議員話：「市民最擔心米貴，政府唔可以只話米價由市場供求釐定就算數，工夫做得唔夠。」尊貴的王議員唔該做吓研究，香港食米一年三十幾萬公噸，全由外國供應，泰國米佔咗九成，香港憑乜嘢條件同人哋講價？當今國際市場中，米價不斷上升，出口國為求自保，紛紛限制食米出口或調高食米出口稅，泰國好彩得天獨厚，係世界米倉，故此仍然有米賣畀友好地區，但當然係依照世界市場價格出售啦，香港唔要，自有菲律賓去搶。如果入口米價上升，港元對泰銖貶值，你話香港米價會唔會上揚呀？唔通馬局長要入口商、批發商管制價格，不准加價？假使如此，米商唔肯蝕本，市面必然缺米，民心豈會不亂？想學埃及發生暴動乎？
馬局長大概不必為王議員上一課經濟學嘞，如有時間，去打番一場高爾夫，鬆弛吓神經好過，費事嘥氣。為市民解決食米嘅方針，第一係解決供應，保證市場有米賣，一定唔可以管制價格；第二係碰上個別市民困難，就由財政司決定財政援助，可考慮向低收入市民發放臨時糧食津貼（注意：係臨時，不能長期）。