超級星期天點可以冇我求驗客？同平時唔同，逢禮拜日我會少啲批判，同大家分享多啲得意新聞，等大家睇得過癮。
次按風暴令全球經濟陷入危機，但估唔到最近球場上得意、周薪成70萬港元嘅簡奴一樣出事；呢個尼日利亞國腳因無錢還債，旗下3部靚車已率先俾人拎去拍賣，遲啲隨時無家可歸㖭！
話說奀嫋鬼命嘅簡奴，踢波經常靠「食腦」，喺英足盃4強對西布朗一箭定江山，助樸茨茅夫殺入英足盃決賽，受盡擁戴，會方亦準備同佢續新約；但估唔到佢成31歲人，一啲理財觀念都冇，善心爆棚識得搞個慈善基金《KanuHeartFoundation》，自己卻自身難保！
04年9月，話說簡奴心郁郁喺北倫敦買入一間價值280萬鎊（約4,300萬港元）嘅豪宅，供10年每年要還28萬鎊，查實對於佢嚟講都唔算好吃力，事關𠵱家每周袋成4.5萬鎊，計起嚟即係月入18萬鎊，換言之個幾月人工已夠畀全年欠款，仲有剩可以拎去飲茶鋸扒。
殊不知，簡奴唔知係咪習慣洗腳唔抹腳，已經年幾冇還錢，借錢畀佢嘅蘇格蘭皇家銀行（RoyalBankofScotland）見勢色唔對，實行天王都冇面畀，派人去收車作抵押。一部2.5萬鎊嘅Benz，將以底價8,300鎊拍賣，而另外兩部合計5萬鎊嘅Audi，底價大概係1.9萬鎊。不過，簡奴暫時仲未使行路返工，事關佢哋仲留番架17萬鎊嘅法拉利畀佢。
9月前要還4,300萬
據知，法官要求該名樸茅前鋒喺今年8月31日前償還280萬鎊欠款，否則今日升值至400萬鎊嘅大屋將被沒收，慘慘慘。屆時簡奴隨時無處容身，惟有冀望捧到英足盃，可以暫時寄住喺樸茅球迷嘅屋企，以免日曬雨淋喇！
特稿：球星要學「自我管理」
歐洲球壇的波牛一旦成功上位，身價幾何級數飆升，一夜間成為暴發戶，不少人都顯得不知所措；若然不幸誤入歧途，只管享樂，夜夜酒池肉林的後果是職業前途毀於一旦。因此，青訓學校課程除了傳授球技外，最好增設不同管理課程。
上文提到的簡奴當然要「補課」，學習財務管理，以免老無所依；而英超不少的麻煩友如保耶、廸奧夫等，就應該跟隨紐卡素「惡人」祖爾巴頓上一上「憤怒管理」（AngerManagement）的課堂，嘗試控制隨時暴發的情緒；而且增強EQ，對場內表現亦肯定有所幫助。
當然，英超近年無論球員、領隊均傳出數不清的桃色醜聞，有識之士應該開設「性慾管理」（SexManagement），讓他們參與其中，藉其他渠道發洩多餘精力。食色性也，乃人類天性，但過份沉迷，卻容易一失足成千古恨啊！文：阿呢斯奧