《CJ7》已經連續兩星期熱賣，雖然好多人把口話「唔好睇」，但碟舖都係Keep住要補貨，星爺魅力、誰可匹敵?!本周銷情最勁係《恐懼鬥室4》，其次為《花鼠明星俱樂部》。問碟舖老細點解？有買碟靚女即搭訕：「因為香港多變態佬囉！」掙扎半秒，話晒今日係FamilyDay，「一隻花鼠吖唔該」！
記者、攝影：朱崇德
首創快轉唱腔
《花鼠》可算係美國音樂及漫畫界經典，威足半個世紀，有50年歷史。原創人Ross喺1958已經諗出以花鼠漫畫再加招牌「音樂轉速快幾度」嘅尖聲唱腔，大玩虛擬樂隊組合，而且仲贏過格林美獎同美國Billboard流行榜冠軍！未聽過？唔使慚愧喎！正如老外冇可能識《老夫子》，道理都係一樣。
勁歌熱舞炸到尾
電影一大賣點，當然係真人加CG啦！論難度，真人要對住空氣先拍，後期再加花鼠，難度真係有「十幾層樓咁高㗎」，有誠意！至於CG花鼠方面，今次都係大Sell一條條靚毛，好難唔同《五星級大鼠》比較啫：論毛質，感覺同「大鼠」只係爭咗半樽蓋「金紡」（要落啲衣物柔順劑）；另外花鼠今次都有玩濕水鼠毛，呢度就真係爭咗成條毛巾喇（快啲畀佢抹亁啦）。不過音效方面，今次係大玩音樂歌舞劇，將《Funkytown》、《WitchDoctor》呢啲舊曲經典，以Rock、Pop、Reggae及HipHop重新演繹，勁歌熱舞由頭炸到尾。而且DD5.1聲效做得唔錯，最難得係連中文譯版都做得一樣咁靚聲，呢度贏番一仗。
鄉下花鼠變大歌星
故事都係以花鼠三兄弟花仔、亞矇同亞肥做骨幹，話說鄉下老鼠誤闖大城市，被主角作曲家戴夫發現佢哋竟然能歌善舞，仲識跳HipHop，一上舞台當然一夜成名啦！後來唱片公司奸老闆利用三鼠貪玩性格，離間佢哋同戴夫感情，再納為己用變成搖錢樹。究竟三鼠能否醒覺，到底係愛親情定愛黃金呢？論故事，正氣過正義堂，唔講仲以為係「老廸」出品，總之就適合星期日一家大細睇啦！
《花鼠明星俱樂部》$129
DVDPro（23326326）
