無綫「《2008香港小姐競選》招募大行動最後召集」昨日在九龍灣MegaBox舉行，多位港姐如葉翠翠、徐子珊、陳茵媺及四位應屆港姐張嘉兒、王君馨、周美欣和何傲兒獲邀出席，眾港姐更以catwalk形式出場，其中，近期博到盡的葉翠翠，身穿一襲綠色背心低胸裙搶去不少風頭。
翠翠事後接受訪問，坦言雖然不是首次行騷，不過仍感覺緊張，她說：「一向行騷都係我嘅強項，本來都唔係大問題，可能今次成group人一齊行，有好多嘢都要兼顧，始終唔及一個人行咁輕鬆。」
張嘉兒不滿表現
不過，現場所見翠翠所穿的裙似乎熟口熟面，她笑說：「今次件衫係公司搵人贊助，所以之前有其他人着過都唔出奇，反而對鞋就係私伙，買咗都有三年，之前都襯唔到衫，估唔到今次用得着！」
此外，張嘉兒對自己行騷的表現不太滿意，她說：「一向我都覺得自己唔夠高，所以行出嚟唔係咁好睇，不過好彩我唔係成日做，所以都會有新鮮感！」
採訪、攝影：何慧斯
